Son.az xəbər verir ki, yeni beynəlxalq araşdırma sübut edib ki, yoğun bağırsaq (kolon) xərçəngi müalicəsindən sonra həyata keçirilən müntəzəm idman proqramları xəstələrin sağ qalma ehtimalını artırır. Kanada, Avstraliya, İngiltərə, İsrail və ABŞ-da aparılan tədqiqat zamanı bir qrup xəstəyə sadəcə maarifləndirici kitabça təqdim olunub, digər qrup isə fərdi məşqçi ilə 3 il ərzində mütəmadi görüşərək fiziki aktivliyini qoruyub.

Əsasən həftədə bir neçə dəfə 45 dəqiqəlik gəzinti ilə məşğul olan bu qrupun üzvlərində 8 il sonra xərçəngin yenidən yaranma riski 28%, ölüm riski isə 37% aşağı qeydə alınıb. Bəzi əzələ ağrıları və zədələr müşahidə olunsa da, nəticələr həm həkimləri, həm də xəstələri ümidləndirib.

Tədqiqat dünyanın aparıcı onkoloji tədbiri olan ASCO konfransında təqdim olunub və "New England Journal of Medicine" jurnalında dərc edilib. Kanadalı mütəxəssis Christopher Booth bildirib ki, bu cür proqramlar xəstəyə bir neçə min dollara başa gəlsə də, onların nəticəsi həm ömrü uzadır, həm də həyat keyfiyyətini yaxşılaşdırır.

Tədqiqatda iştirak edən və idmanı həyatına daxil edən Terri Swain-Collins qeyd edib ki, məşqçi dəstəyi ilə məsuliyyət hissi formalaşır və bu sayədə idmanı tərk etmək istəməyib. İndi də gündəlik gəzintilərini davam etdirir.

Alberta Universitetindən Kerry Courneya isə vurğulayıb ki, insanlar idmanın faydasına inandıqları və dəstək aldıqları zaman bu vərdişi uzunmüddətli davam etdirə bilirlər: "Artıq əminliklə deyə bilərik ki, fiziki aktivlik xərçəngdən sonrakı sağ qalma ehtimalını artırır."

Mütəxəssislər yoğun bağırsaq xərçəngindən sağalan bütün şəxslərə aktiv həyat tərzini seçim etməyi və mütəmadi idmanla məşğul olmağı tövsiyə edirlər.