Prezident İlham Əliyevin apardığı siyasətin prioritet ideoloji xətlərindən biri olmaqla Qərbi Azərbaycan məsələsi bu gün beynəlxalq gündəlikdə daha çox aktuallıq qazanır.

Azərbaycan bu məsələdə tarixi tədqiqatlar, hüquqi əsaslandırmalar, beynəlxalq təşəbbüslər və diplomatik təzyiq kimi çox komponentli yanaşma tətbiq edir. Belə kompleks yanaşma ideoloji xəttin davamlılığını təmin etməklə yanaşı, Azərbaycanın haqlı tələblərinin beynəlxalq səviyyədə tanınmasını gücləndirir. Keçmişdə baş verənlərin dərindən təhlili və elmi bazanın formalaşdırılması deportasiyaya və etnik təmizləməyə məruz qalmış yüz minlərlə qərbi azərbaycanlıların hüquqlarının müdafiəsinə yönəlmiş gələcək fəaliyyətlər üçün zəmin yaradır.

Problemin həllində ən mühim addımlardan biri Qərbi Azərbaycandan olanların ictimai təşkilatlarının vahid Qərbi Azərbaycan İcması altında birləşdirilməsi oldu.

Sözügedən addım həm təşkilati, həm də siyasi baxımdan böyük əhəmiyyət kəsb edir. Eyni zamanda, yeni struktur səylərin təmərküzləşməsinə, fəaliyyətlərin əlaqələndirilməsinə və problemin həlli üçün sistemli yanaşma tətbiqinə şərait yaradılıb.

İcma yalnız daxili konsolidasiyanı həyata keçirməklə kifayətlənməyib, eyni zamanda Qərbi Azərbaycan məsələsini beynəlxalq gündəmə çıxarmaq üçün fəal iş aparır. Bu, beynəlxalq təşkilatların, insan hüquqlarının müdafiəsi və təminatı qurumlarının, xarici hökumətlərin və geniş ictimaiyyətin diqqətini cəlb etmək məqsədi daşıyır. Artıq hər keçən gün bu məsələnin yalnız milli faciə deyil, həm də insan hüquqlarının müdafiəsi baxımından beynəlxalq çağırış olduğu anlayışı daha da güclənir. Azərbaycan açıq şəkildə bəyan edir: qərbi azərbaycanlıların öz doğma, tarixi torpaqlarına qayıdışının təmin olunması onların fundamental hüququdur və qaçılmaz prosesdir.

Bu hüquq müzakirə mövzusu ola bilməz, çünki o, Ümumdünya İnsan Hüquqları Bəyannaməsi, Qaçqınların Statusu haqqında Konvensiya və digər beynəlxalq hüquqi sənədlərdə dəqiq təsbit olunub.

Azərbaycan hazırda Ermənistandan beynəlxalq hüquq normalarına uyğun aydın, konkret, məntiqi və şəffaf mövqe gözləyir. Bakı Ermənistan rəhbərliyindən soydaşlarımızın tarixi torpaqlarına qayıdış hüququnun tanınması, Qərbi Azərbaycana dönəcək şəxslər üçün təhlükəsizlik təminatlarının verilməsi, infrastrukturun bərpası və qayıdışın gerçəkləşəcəyi ərazilərdə normal həyat üçün şəraitin yaradılması kimi konkret addımların atılmasını tələb edir.

Qərbi Azərbaycanda soydaşlarımızın deportasiyaya və etnik təmizlənməyə məruz qalmazdan öncə yaşadıqları kəndlərin tam əksəriyyəti tamamilə boşdur. Vaxtilə çiçəklənən bu torpaqlar indi viranə qalaraq cansız ərazilərə çevrilib. Həmin torpaqlar öz qanuni sakinlərindən məhrum edilib, infrastrukturu məhv olunub, inkişaf potensialı isə tamamilə itirilib. Ermənistan bu ərazilərin taleyi barədə danışmaqdan şüurlu şəkildə yayınaraq, orada azərbaycanlıların mövcudluğu haqqında xatirələri silməyə, tarixi faktları yox etməyə, abidələri və izləri büsbütün məhv etməyə çalışır. Amma reallığı danmaq mümkün deyil: həmin torpaqlar zorakılıq və etnik təmizləmə təhdidi ilə oradan çıxarılmış azərbaycanlılara məxsusdur.

Azərbaycan xalqı və hakimiyyəti Ermənistanın baş nazirini Qərbi Azərbaycan İcmasının nümayəndələri ilə birbaşa dialoqa çağırır. Bu addım Avropa standartlarına uyğun hərəkət etdiyini iddia edən bir ölkə üçün məntiqli olardı.