Yanğın saat 01:30-da, hərbi hissənin binalarından birində sobanın benzinlə qızdırılması səbəbindən baş verib. Hadisə nəticəsində 15 çağırışçı ölüb, daha 6 çağırışçı və bir zabit bədən xəsarətlərilə Göyçə mahalının qarnizon hospitalına gecə saat 02:00 radələrində çatdırılıb.

Yanğınla mübarizə 5 saat davam edib.

Cinayət işinin materialları İstintaq Komitəsinin Baş Hərbi İstintaq İdarəsinə göndərilib.

Bu məlumat Ermənistanın Müdafiə Nazirliyinin və Baş Prokurorluğunun yaydıqları rəsmi bəyanatlardandır.

Kənddəki kazarmada baş vermiş yanğınla bağlı Ermənistan Silahlı Qüvvələrinin 2-ci Ordu Korpusunun komandanı Vahram Qriqoryan, Müdafiə Nazirliyinin Baş Yanğın Təhlükəsizliyi İdarəsinin rəisi, 2-ci Ordu Korpusunun qərargah rəisi polkovnik Miqran Maxsudyan, korpus komandirinin arxa cəbhə üzrə müavini polkovnik Şiraz Xaçatryan və döyüş xidməti üzrə korpus komandirinin müavini polkovnik Artur Ohanyan vəzifələrindən kənarlaşdırılıblar.

Cəzalar baş vermiş faciə ilə bağlı Ermənistan cəmiyyətində yaranmış qəzəbi və aqressiyanı bir qədər azaltmaq məqsədi güdür.

Amma vəzifədən kənarlaşdırmalar, hətta həbslər belə, Ermənistan Silahlı Qüvvələrinin bərbad vəziyyətinin mənzərəsini dəyişə bilməz.

2-ci Qarabağ Müharibəsində tam məğlub olaraq kapitulyasiyaya məruz qalan Ermənistan ordusunun "modernləşməsi" və təminatının yaxşılaşdırılması, habelə döyüş hazırlığı ilə qabiliyyətinin "yüsəldilməsi" məqsədilə baş nazir Nikol Paşinyanın göstərişi ilə dövlət büdcəsindən 482,45 milyon dollar vəsait ayrılıb.

Maliyyə və Müdafiə nazirliklərinin rəhbərliklərinin açıqlamalarına görə, sözügedən vəsaitin böyük qismi "təyinatı üzrə sərf olunub".

Lakin hara, necə?

Ermənistan Silahlı Qüvvələrindəki kazarmaların, yəni əsgər qışlalarının və hərbi hissələrin təqribən 99,8 faizi həddən ziyadə pis vəziyyətdədir.

Binalar və tikililər sovetlər dönəmində inşa olunmuş baraklardır.

Azad kəndindəki kazarma isə ümumiyyətlə, mal-qara fermasından əsla fərqlənmir.

İlkin məlumatlara görə, yanğının başvermə səbəbi də həmin fermaya bənzəyən barakdakı erməni əsgərlərin qışın soyuğunda qızınmaq üçün elektrik sobasından istifadə etmələri olub.

Kustar üsulla hazırlanmış qızdırıcı qısaqapanma yaradıb, yanğın başlayıb.

Həmin yanğında da 15 erməni hərbçi yanıb.

Yanan sadəcə, Azaddakı kazarma yox, Ermənistan ordusuna ermənilərin ümidləri idi.

Orxan Hun Son.az