Son.az dailymail-ə istinadla xəbər verir ki, geri çağırmaya 223 315 "Expedition" və 50 474 "Navigator" modeli daxildir. ABŞ-nin Milli Yol Hərəkəti Təhlükəsizliyi Administrasiyasının (NHTSA) sənədlərinə görə bu avtomobillərdə ön əyləc boruları mühərrikin hava təmizləyici çıxış borusuna toxuna bilər. Bu, montaj zamanı baş vermiş potensial quraşdırma xətası ilə əlaqələndirilir.

Nasazlıq əyləc mayesinin sızmasına və əyləc funksiyasının zəifləməsinə səbəb ola bilər. Sürücülər əyləcin zəif işlədiyini, pedalın daha dərinə basılmalı olduğunu və nəticədə qırmızı əyləc xəbərdarlıq işığının yanmasını hiss edə bilərlər.

Ford bu problemə görə hələlik qəza və ya xəsarət qeydə almadığını bildirib və hesab edir ki, geri çağırılan avtomobillərin yalnız 1 faizində nasazlıq ola bilər. Lakin aprelin 17-dən bəri 45 sürücü bu nasazlıqla bağlı şikayət edib.

Ford mayın 26-dan etibarən təsirlənmiş avtomobil sahiblərinə məktub göndərəcək. Məktubda problemin necə aradan qaldırılacağına dair təlimat da yer alacaq. "Ford" və "Lincoln" rəsmi servisləri avtomobilləri pulsuz yoxlayacaq və ehtiyac olarsa, əyləc borusu və ya hava çıxış borusunu dəyişəcək.

"Ford" mart və aprel aylarında Kentukki Zavodunda istehsal prosesi ilə bağlı araşdırma aparıb. Aşkarlanıb ki, 2024-cü il noyabrın 20-də mühərrik quraşdırılması zamanı radiator borusunun yerləşdirilmə qaydası dəyişdirilib. Bu dəyişiklik nasazlıqların qarşısını almağa yönəlib. Həmin tarixdən əvvəl istehsal olunan bəzi modellərdə radiator borusu əyləc borusuna ilişə və onu əyərək yanlış istiqamətə yönəldə bilərdi. Nəticədə əyləc borusu mühərrikdəki digər hissəyə - hava təmizləyici çıxış borusuna sürtünüb zədələnə bilərdi.