Azərbaycan Ordusunun mövqelərini atəşə tutan, silahlı diversiyalara və təxribatlara əl atan Ermənistan bu dəfə həm öz silahlı qüvvələrindən, həm də Rusiya Sülhməramlı Kontingentinin (RSK) müvəqqəti yerləşdiyi ərazilərdəki qarabağlı ermənilərin silahlı dəstələrindən yararlanır.

Xankəndindəki separatçı rejimin rəhbəri Arayik Arutyunyanın Vaşinqtonda Azərbaycanla sülh danışıqları aparan Ermənistan hökumətinə müraciəti də simptomatikdir.

O, Ermənistanın XİN başçısı Ararat Mirzoyana xitabında bildirib: "Azərbaycanla sülh danışıqların dərhal dayandırın".

Ermənistanın baş naziri Nikol Paşinyan Bakı ilə sülh danışıqlarında maraqlı olduğunu vurğulayır, şərti dövlət sərhədinin delimitasiya və demarkasiyası prosesinə başlamağa tələsdiyini bəyan edir, Qarabağı Azərbaycan ərazisi saydığını və qarabağlı ermənlərin hüquqları ilə təhlükəsizliklərinin təminatı məsələlərinin məhz Bakı vasitəsilə təmin oluna biləcəyini istisna etmir.

Bütün bunlar Ermənistanın real siyasəti yox, görüntü yaratmaq naminə edilən çıxışlardır. İrəvanın əsl məqsədi sülh danışıqlarını ləngitmək və alınarsa, təxirə salmaqdır. İrəvan eyni zamanda, sürətlə silahlanmaq, ordusunun qalıqlarını gücləndirmək fikrindədir və bu istiqamətdə Azərbaycana təzyiq vasitəsi kimi qarabağlı erməniləri, xüsusilə də separatçıların silahlı dəstələrini pressinq aləti kimi görür.

Ermənistanın belə təhlükəli illüziyalara qapılmasında ermənilərin hamiləri, xüsusilə də Fransa və rəsmi Parisin diqtəsi ilə hərəkət edən Avropa İttifaqı məmurları xüsusi rol oynayırlar.

Ermənistan hazırda RSK-nın müvəqqəti yerləşdiyi ərazilərdəki separatçı silahlı dəstələrdən istifadə edərək yeni təxribatlar hazırlayır.

Ermənilər mövqelərimizi atəşə tutmaq, bölgədə gərginlik yaradaraq onu maksimal həddə çatdırmaq və bu minvalla da sülh danışıqları prosesində ciddi problemlər yaratmaq niyyətindədir.

Təxribatlar artıq başlanıb.

Belə ki, dünən saat 20:05-də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri tərəfindən Ordumuzun Ağdam rayonunun Qalayçılar kəndi istiqamətində yerləşən mövqeləri atıcı silahlardan atəşə tutulub.

Atəş nəticəsində Azərbaycan Ordusunun hərbi qulluqçusu Bəkirov Əli Şükür oğlu yaralanıb.

Yaralı hərbi qulluqçumuz dərhal hərbi tibb müəssisəsinə təxliyə edilib, həyatı üçün təhlükə yoxdur.

Buna cavab olaraq ordumuzun başladığı "Zərbə" əməliyyatı zamanı erməni silahlı dəstələrinin Ağdərə və Xocavənd istiqamətindəki mövqelərinə endirdiyi zərbələr nəticəsində  4 erməni hərbçi - Armo Abqaryan, Samvel Torosyan, Ervand Tadevosyan və Qaqik Balayan məhv edilib.

Ermənilərin təxribatları davam etdirəcəkləri təqdirdə, "Zərbə"nin yeni, daha ağır variasiyası reallaşa bilər. Əməliyyat təkrarlanacaq və ümid edirik ki, bu dəfə hərbçilərimiz erməni separatçılarını qabaqlayaraq düşmənə preventiv zərbələr endirərək onların mövqelərini məhv edəcəklər.

Ermənistan və RSK-nın nəzarətindəki separatçı ermənilər Azərbaycan Ordusunun mövqelərinə atəş açmağın ölümə səbəb olacağını, hər belə atəşdən sonra bir neçə erməni silahlının məhv ediləcəyini dəqiq bilib bunu şüurlarında aksioma çevirməsələr, "Azərbaycan əsgərini hədəfə almaq olmaz!" anlamı ermənilərdə şərti refleksə çevrilməyincə Ordumuz düşmənə dərslərini davam etdirməlidir.

Səbəb sadədir: Vaşinqtonda Azərbaycan və Ermənistanın XİN başçıları arasında danışıqların növbəti mərhələsi başladığı zaman belə davranış, gərginlik yaratmaq niyyətinin arxasında birmənalı olaraq Ermənistanın hamiləri - Rusiya və Fransa durur.

Artıq dəfələrlə sübut edilib ki, RSK-nın müvəqqəti yerləşdiyi ərazilərdə qarabağlı erməni separatçıların mövqelərinə silah-sursatın və yanacağın daşınmasını bilavasitə rusiyalı sülhməramlılar təmin edirlər. Xankəndindəki terrorçu rejimin başıpozuq silahlı dəstələrini məhz RSK himayə edir, qoruyur və faktiki olaraq, idarə etməyə çalışır.

Eyni zamanda, Ermənistanla Azərbaycan arasındakı şərti dövlət sərhədinin yaxınlığına gələrək Laçın yolunun başlanğıcında fotosessiyalar edərək sosial şəbəkələrdə paylaşan Natali Luazo kimi korrupsioner, qərəzli siyasətçilərin fəaliyyəti də erməniləri yeni təxribatlar törətməyə sövq edən amillər arasındadır.

Separatçıları dəstəkləyən, qarabağlı ermənilərin separatizmini "hüquqlar uğrunda mübarizə" kimi təqdim edən belə siyasətçilərin mövqelərinin ilk əvvəl Qərblə Azərbaycan arasındakı münasibətlərə hansı mənfi təsirlər etdiyini ilk əvvəl Brüssel və Strasburq, sonra Aİ ölkələrinin hakimiyyət dairələri dərk etməlidir.

Yeni təxribatlar hazırlayan Ermənisann rəhbərliyi isə bilsin ki, hazırda RSK-nın müüvəqqəti nəzarət arealında olan, sayları təqribən 9800 nəfər olan erməni silahlılarının hansısa "hərbi əməliyyatı gerçəkləşdirmək" perspektivi yoxdur.

Onlar ya könüllü tərksilah olaraq Ermənistana yollananacaqlar, ya da təxribatlara əl atsalar, məhv ediləcəklər.

Hadisələrin fərqli inkişaf məcrası yoxdur.

Elçin Alıoğlu Son.az