Bu fikirləri Trend BİA-nın "Sahil Kərimli ilə Aktual" müəllif videolayihəsinə müsahibəsində təhlükəsizlik orqanlarının və 1-ci Qarabağ müharibəsinin veteranı, polkovnik Telman Budaqov bildirib.

O, əlavə edib ki, 90-cı illərin əvvəllərində xarici xüsusi xidmət orqanları Azərbaycanda ciddi təxribat pozuculuq fəaliyyəti ilə məşğul idi.

"Milli məsələləri qaldırırdılar, cənubda, şimalda separatçılıq alovladırılırdı. Bir tərəfdən də erməni təcüvüzü. Daxildə siyasi çəkişmələr, iqtisadi tənəzzül mövcud idi. Bütün bunlar çox təhlükəli proseslər idi. Belə bir ziddiyyətli məqamda Heydər Əliyev hakimiyyətə gəldi və ölkəni bu bəlalardan xilas etdi. Ulu öndərin qətiyyəti, siyasi təcrübəsi xarici xüsusi xidmət orqanlarının planlarını pozdu. Dövlət çevrilişinə cəhdlərin də qarşısı peşəkarlıqla alındı. Heydər Əliyevdən başqa ikinci bir şəxs bu çətin işin öhdəsindən gələ bilmərdi", - deyə o, əlavə edib.

Telman Budaqov qeyd edib ki, Heydər Əliyev sabitlik və təhlükəsizliyi yaratdıqdan sonra iqtisadi inkişafın əsasını qoydu:

"Neft müqavilələri çox ağır dövrdə imzalandı. İqtisadi inkişaf artdıqca ordu quruculuğu lazımi səviyyəyə qaldırıldı. Heydər Əliyevin təməlini qoyduğu güclü ordumuz sonrakı illərdə daha da gücləndi və biz Qarabağ Zəfərini qazandıq", - deyə o, əlavə edib.

Polkovnik xüsusilə vurğulayıb ki, Heydər Əliyev təkcə Azərbaycanın yox, həmin dövrdə qonşu Gürcüstanın da problemlərinin həllində yaxından iştirak edib.

"Gürcüstanın dövlət orqanlarında yüksək vəzifələr tutanların əksəriyyəti milliyyətcə erməni idi. Həmin ermənilər çalışırdılar ki, Gürcüstanda yaşayan azərbaycanlıları qovsunlar. Müxtəlif təzyiqlər, təxribatlar hazırlanırdı. Ermənilər istəyirdi ki, milli zəmində münaqişə yaransın. Hətta bəzi azərbaycanlılar Gürcüstandan köç edirdi. Bu prosesin də qarşısını birbaşa Heydər Əliyev aldı. Onun Gürcüstanın keçmiş prezidenti Eduard Şevardnadze ilə şəxsi dostluğu sayəsində bu təhlükələr dəf edildi. Bundan başqa, Gürcüstan dövlət qurumları tədricən ermənilərdən təmizləndi, milliləşdi. Bütün bunlar Heydər Əliyevin Azərbaycan və gürcü xalqları qarşısında müstəsna xidmətləridir".