Bunu Trend-ə siyasi şərhçi Elçin Mirzəbəyli deyib.

O qeyd edib ki, 30 ilə yaxın bir zaman kəsiyində Azərbaycan torpaqlarının Ermənistan tərəfindən işğalına, yüzminlərlə azərbaycanlının öz evlərindən didərgin düşməsinə, onminlərlə günahsız insanın, o cümlədən, uşaqlar və qadınların, ahılların xüsusi amansızlıqla qətlə yetirilməsinə, xalqımıza məxsus tarixi, dini, mədəni abidələrin, yaşayış məskənlərinin - kəndlərin, qəsəbələrin, şəhərlərin vəhşicəsinə dağıdılmasına seyrçi qalan, imkan düşdükcə təcavüzkara birbaşa və dolayısıyla dəstək verən AP-ın ölkəmizi növbəti dəfə "Ermənistana hərbi təcavüz etməkdə" suçlamağa hazırlaşması siyasi əxlaqsızlığın və simasızlığın Avropa parlamentariləri tərəfindən davam etdirilməkdə olan klassik ənənələrinin bariz nümunəsidir.

"Hələ qədim Roma dövründə qəbul edilən mahiyyətcə riyakar, əsassız, böhtan və yalan xarakterli qərarlara etirazını bildirən böyük filosof, natiq və siyasətçi Siseron "Heyf ki, kağız qızarmır" deyirdi və bildirirdi ki, əgər Roma siyasətçilərinin zərrə qədər də həya etmədən qəbul etdiyi qərarların yazıldığı kağız canlı olsaydı, onların əvəzinə utanıb-qızarardı. Görünür, "Qoca Qitə"nin böyük bir hissəsini əhatə edən Avropa Parlamentinin durumu Siseronun dövründəki parlamentdən daha acınacaqlıdır. Çünki Avropa Parlamentində həyasızcasına uydurulmuş yalanlardan ibarət kağız parçalarına etiraz edə, həqiqəti söyləyə biləcək bircə nəfər belə yoxdur.

Çirkli pullar müqabilində Ermənistan və erməni diasporu da daxil olmaqla ayrı-ayrı ölkələrin, təsisatların nüfuz müvəkkliyini yerinə yetirən parlamentarilərin "meydan suladığı" Avropa Parlamenti öz nüfuzunu çoxdan itirib və parlamentarizm prinsipləri ilə deyil, maraqlarla idarə olunur.

Ötən ilin dekabrından həbsdə olan Avropa Parlamentinin Yunanıstandan olan vitse-prezidenti Eva Kailinin adının milyonlarla dollarlıq korrupsiyada hallanması da sözügedən təsisatın "gerçək missiyası"nın hansı əməllərdən ibarət olduğunu bir daha sübuta yetirir. Qeyd edim ki, Eva Kailin ifşa olunanadək Avropa Parlamentində həm də erməni lobbisinin fəal üzvlürəndən biri kimi çıxış edirdi. Onun adının, həbsindən 1 ay əvvəl Avropa Parlamentinə ölkəmiz əleyhinə qətnamə layihəsi təqdim edən 33 parlamentarinin siyahısında yer alması Eva Kailin lobbiçilik fəaliyyətinin nə qədər çoxşaxəli və genişmiqyaslı olduğunu sübuta yetirir. Eva Kailin də Avropa Parlamentindəki Ermənistanla "dostluq" qrupunun digər üzvləri kimi, erməni separatçılarının və ASALA da daxil olmaqla erməni terror təşkilatlarının hamisi, ultramillətçi Daşnaksütyunun Avropadakı "ədalət və demokratiya uğrunda erməni federasiyası" adı altında gizlənmiş təsisatının rəhbəri, erməni lobbisinin rüşvət və korrupsiya şəbəkəsinin əsas fiqurlarından olan Kaspar Karampetyanın yaxın ətrafına daxil olan şəxslərdən sayılır. Karampetyan Avropa parlamentarilərini "dirijor çubuğu" ilə istədiyi kimi idarə edir.

Kaspar Karampetyanın yaxın dostu, Şimali Kiprdən olan deputat, AP-dəki "erməni dostluq qrupunun rəhbəri" Lukas Furlasın qalmaqallı seçki kampaniyası ilə bağlı məlumatlar, onun Avropa Parlamentinə Daşnaksütyunun çirkli pulları ilə yol tapdığını təsdiqləyən amil kimi dəyərləndirilə bilər. Belçikada Afrikadan əldə etdiyi çirkli və qanlı pullar hesabına brilliant şəbəkəsinin sahibi olan Kaspar Larampetyanın maliyyə vəsaitlərinin bir hissəsi Şimali Kiprdə - offşor zonasında saxlanılır və Lukas Furlas kimi şəxslərin vasitəsilə Avropa siyasətçilərinin ələ alınmasında istifadə edilir", - deyə E.Mirzəbəyli bildirib.

O qeyd edib ki, Belçikanın "Le Soir" nəşrinin son araşdırmalarından birində yer alan Avropa parlamentarilərinin 13%-nin üçüncü şəxslərin dəvəti ilə müxtəlif səfər və ziyafətlərdə iştirak etməsi ilə bağlı faktlar isə, şübhəsiz ki, aşkarlanan faktların cüzi bir hissəsini təşkil edir.

"Lakin bu faktlar da Avropa Parlamentindəki real durumun anlaşılması üçün yetərlidir. "Le Soir"in araşdırmasında belə səfər və ziyafətlərin, əsasən, Ermənistan və erməni diasporu tərəfindən təşkil olunduğu bildirilir.

Karampetyanın təşkil etdiyi ziyafətlərdə Lukas Furlasın, Fransadan olan digər parlamentari Fransual-Ksavye Bellami ilə ön sıralarda olması, Kaspar Karampetyanın Lukas Furlasa "Avropa insititutları ilə 20 illlik əməkdaşlığa görə" təşəkkürünü bildirməsi Ermənistanla "dostluq qrupu"nun rəhbərinin Avropa Parlamentarilərinin satın alınmasında əsas fiqurlardan biri oldiğunu sübuta yetirir.

Lukas Furlas Avropa Parlamentində, həm də Karampetyanın cəsusu kimi fəaliyyət göstərir. Avropa parlamentarilərininin zəif yerlərini öyrənir, məlumatları Karampetyana ötürür və sonra isə qızıl həvəskarı olanlara qızıl üzüklər, daş-qaş sevənlərə brilliantlarla süslənmiş hədiyyələr, bəzilərinə isə orientasiyalarına uyğun olaraq canlı "mükafat"lar göndərilir.

Bütün bunlar dünyaya "demokratiya, insan hüquqları" dərsi keçməyə çalışan Avropa parlamentarilərinin gerçək və iyrənc simalarını gün işığına çıxaran məqamların sadəcə cüzi bir hissəsidir. Görünməyən, üzə çıxmayan iyrəncliklərin sayı isə bundan dəfələrlə çoxdur.

Belələrindən ədalət gözləməyə isə dəyməz.

Gözləri qatı iqrçilik, islamafobiya və ksenofobiya pərdəsi ilə örtülmüş Avropa parlamentariləri nədənsə erməni vəhşiliyinin Azərbaycanın işğaldan azad edilmiş ərazilərindəki qanlı izlərini görmür, bəşər tarixinin ən utancverici mənzərəsinə nəzər salmaq, münasibət bildirmək istəmirlər. 44 günlük müharibədən sonra 300-ə qədər Azərbaycan vətəndaşı Ermənistanın mina terrorunun qurbanı olub. Onların arasında öz peşə borclarını yerinə yetirən media nümayəndələri də var. Maraqlıdır, görəsən, nədən öz maraqlarına uyğun gəldiyi halda "söz və fikir azadlığı"ndan saysız-hesabsız sabun köpüyü üfürən Avropa parlamentariləri azərbaycanlı jurnalistlərin, günahsız insanların erməni terrorunun qurbanına çevrilmələrinə seyrçi qalırlar? Bəlkə ermənilərə Avropa Parlamenti tərəfindən xüsusi status verilib və onlar günahsız insanları qətlə yetirə, başqalarının torpaqlarını mənimsəyə, evlərini, ziyarətgahlarını dağıda bilərlər? Bu, necə təfəkkürdür? Bu ibtidai icma düşüncəsinin, qəbilə təfəkkürünün daşıyıcısı olan insanlar hansı haqla Azərbaycana qarşı ittihamlarla çıxış edirlər?

Avropa Parlamentinin qəbul etməyə hazırlaşdığı mövbəti "qətnamə" də bizim üçün əzik-üzük, simasızlığa, riyakarlığa, siyasi əxlaqsızlığa bulaşmış kağız parçasıdır və heç bir halda Azərbaycan dövlətinin iradəsinə, Azərbaycan xalqının mövqeyinə, ölkəmizin öz qanuni hədflərinə çatmasına maneə yarada bilməz", - deyə o əlavə edib.