Son.az axar.az-a istinadən bildirir ki, bu sözləri Güney Azərbaycan Milli Oyanış Hərəkatı (GAMOH) İdarə Heyətinin üzvü Ağrı Qaradağlı Tehran rejiminin yaxın vaxtlar üçün gözlənilən əfv sərəncamından danışarkən deyib.

O bildirib ki, rejimə qarşı çıxanlar və milli məsələyə görə mühakimə olunan siyasi məhbuslar əfv sərəncamından kənarda qalır:

"İkinci Qarabağ savaşında İranın Ermənistana yardım etməsinə görə Təbriz və Ərdəbildə etiraz aksiyası keçirildi. Onlar yardımın dayandırılmasını və Nurduz sərhədinin bağlanmasını tələb edirdi. Bu aksiyada 300-ə yaxın insan tutulmuşdu. Onların arasında 20-yə yaxını qadın milli fəal idi. Saxlanılan etirazçılardan bəziləri qısa müddət sonra azad olunsa da, milli hərəkatın bir çox nümayəndəsi ağır cəza aldı. Bu şəxslərə milli fəaliyyətlərinə görə əvvəllər də xəbərdarlıq olunmuşdu. Onlara hər hansı milli məsələdə təkrar yaxalansalar, ağır cəza veriləcəyi deyilmişdi. Buna baxmayaraq, milli fəallarımız etiraz aksiyalarında iştirak etdi və rejimin qara siyahısına düşdü. Bu günə kimi də müxtəlif bahənələrlə təqib olunurlar. Həbs olunanlar isə üç ildən beş ilədək azadlıqdan məhrum ediliblər. Tutulanlar arasında Pərviz Siyabi, Hüseyn Balaxanı, Mürtəza, Mustafa, Muctaba Pərvin qardaşları, Hamid Heydəri, Məhəmməd Colani, Sübhan Bəxşi, Mehdi Huşmənd, Bəhmən Xeyrcu, Süleyman Əlizadə, Əsgər Əkbərzadə, Səccad Colani kimi tanınmış fəallar var idi. Bunlardan Pərviz Siyabi, Süleyman Əlizadə, Hamid Heydəri hal-hazırda həbsdədir. Onlar da bu sərəncamdan yararlanmalıdır. Lakin buna ümid etməyin mənası yoxdur. Çünki rejimin belə humanist tərəfini hələ görən olmayıb", - o bildirib.