Son.az Trend-ə istinadən bildirir ki, bunu Azərbaycanın ATƏT-dəki daimi nümayəndəsi Rövşən Sadıqbəyli bu gün ATƏT-in Daimi Şurasının xüsusi iclasında Ermənistanın xarici işlər naziri Ararat Mirzoyanın çıxışına cavab olaraq deyib.

Onun sözlərinə görə, Azərbaycan qanunvericiliyinə və Konstitusiyasına uyğun olaraq milli və etnik mənsubiyyətindən asılı olmayaraq, bütün vətəndaşlarına bərabər hüquqlar təmin etməyə hazırdır.

"Bu məqsədlə Azərbaycan yerli erməni sakinlərlə qarşılıqlı əlaqə yaratmaq, regionun mühüm su təchizatı, nəqliyyat və enerji təchizatı məsələlərini həll etmək üçün ardıcıl və uğurlu səylər göstərir. Bu təmaslar təşviq edilməli və dəstəklənməlidir. Ruben Vardanyan kimi şübhəli stajı olan şəxslər kövrək sülh quruculuğu prosesini pozmaq üçün Azərbaycanın Qarabağ bölgəsinə gətirilib", - Sadıqbəyli bildirib.

O vurğulayıb ki, müharibə və işğalın dağıdıcı nəticələrinə və sağalmamış yaralarına baxmayaraq, münaqişə başa çatdıqdan sonra Ermənistanla dövlətlərarası münasibətlərin qarşılıqlı tanınması və ərazi bütövlüyünə hörməti özündə ehtiva edən beş əsas prinsip əsasında normallaşdırılma prosesinin təşəbbüskarı məhz Azərbaycan olub.

Xatırladaq ki, Qarabağdakı separatçı rejimin lideri Ruben Vardanyan Rusiya sülhməramlı kontingentinin müvəqqəti yerləşdirildiyi Azərbaycan ərazisində faydalı qazıntı yataqlarının qeyri-qanuni istismarı ilə bağlı vəziyyət, habelə bunun yaranan ekoloji və digər nəticələri ilə əlaqədar keçirilməsi nəzərdə tutulan ekoloji monitorinqi pozub.

2022-ci il dekabrın 3 və 7-də Rusiya sülhməramlı kontingentinin komandanlığı ilə aparılmış danışıqların nəticələrinə əsasən, İqtisadiyyat Nazirliyinin, Ekologiya və Təbii Sərvətlər Nazirliyinin, Nazirlik yanında Dövlət Əmlak Xidmətinin bir qrup mütəxəssisi Dekabrın 10-da Azərbaycan iqtisadiyyatı və "AzerGold" QSC ilkin monitorinqlərə başlamalı idi. Faydalı qazıntı yataqlarının, xüsusilə Qızılbulaq qızıl yatağının və Dəmirli mis-molibden yatağının yoxlanılması, müxtəlif ərazilərdə monitorinqlərin aparılması, əmlakın kadastr uçotunun təşkili, ətraf mühitə, qrunt və yerüstü su mənbələrinə vurula biləcək zərər və risklərin qiymətləndirilməsi nəzərdə tutulmuşdur. Lakin qrup Rusiya sülhməramlılarının müşayiəti ilə monitorinq zonasına gəlsə də, hər iki istiqamətdə təxribatlarla üzləşib. Belə ki, Rusiya sülhməramlılarının bunun üçün nəinki lazımi şərait yaratmaması, hətta bu prosesin qəsdən pozulmasında iştirak etməsi səbəbindən planlaşdırılmış ilkin yoxlama və monitorinq baş tutmayıb.

Son.az