Azərbaycanın ilk mobil rabitə operatoru olan “Bakcell” şirkəti “Facebook” sosial şəbəkəsində abunəçilərin suallarının cavablandırma səviyyəsinə görə 2017-ci ildə ikinci dəfə “Socially Devoted” sertifikatı ilə təltif olunub. 

Bu barədə “Report”a şirkətdən məlumat verilib.

Məlumatda deyilir ki, bu ilin II və III rübündə “Bakcell” özünün “Facebook” səhifəsinndə abunəçilərin sorğularının cavablandırılması üzrə ən yüksək göstəricini (100%) əldə edib: “Sosial şəbəkələrdə təmsil olunmaq nəinki təqdim olunan kontentin keyfiyyətinə, həm də öz abunəçilərinin və səhifənin digər istifadəçilərinin sualları və rəylərinin vaxtında və operativ şəkildə cavablandırılmasına görə brendlərin üzərinə böyük məsuliyyət qoyur. İstifadəçilərin suallarına və rəylərinə verilən cavabların yüksək əmsalı (“Response Rate”) istənilən səhifə üçün müştərilərə göstərilən onlayn xidmətlərin mühüm effektivlik göstəricisidir”.

Açıqlamada deyilir ki, “Bakcell” “Response Rate” üzrə yüksək göstəricilərinə görə dəfələrlə “Socially Devoted” sertifikatına layiq görülüb və öz göstəricilərini hər dəfə daha da yüksəldərək, son illər 100%-lik həddə çatmağa nail olub.

Sosial media vasitələri məhsul və xidmətlər haqqında məlumatların geniş abunəçi bazasına daha yaxşı çatdırılması və abunəçilərin suallarının cavablandırılması baxımından “Bakcell”in vacib kommunikasiya vasitələrindən biridir. Şirkətin bir çox sosial şəbəkədə rəsmi səhifəsi fəaliyyət göstərir.