"Azərbaycanda 2015-ci ildə yeni iqtisadi şəraitin yaranması ilə ölkənin maliyyə sektorunun düşdüyü vəziyyətdən çıxarılması üçün dövlət etməli olduğunu edib".

“Report” xəbər verir ki, bunu bu gün Bakıda keçirilən “Azərbaycanda mikromaliyyənin gələcəyi: çətinliklər və imkanlar” adlı V İnvestorlar Yarmarkasında Azərbaycan Banklar Assosiasiyasının (ABA) prezidenti Zakir Nuriyev deyib.

“Yeni iqtisadi şəraitə uyğun Strateji Yol Xəritələri qəbul edilib, maliyyə sektoruna nəzarət üçün Maliyyə Sabitliyi Şurası yaradılıb, lazımi tədbirlər həyata keçirilir. Bankların maliyyə imkanlarının genişləndirilməsi, onların manatla olan resurslara çıxış imkanlarının artırılması üçün “Nağdsız hesablaşmalar haqqında” qanun qəbul edilib. Son nəticədə bank sektorunda 4 mlrd. manat məbləğində likvidlik yaranıb. Artıq xaricdən vəsait cəlb etməyə ehtiyac qalmayıb. Banklar daxildən manatla vəsait cəlb edə biliblər. Yaxın vaxtlarda banklararası açıq hərrac mexanizmi işə düşəcək və mövcud likvid vəsaitlər maliyyə subyektləri, bazar iştirakçıları arasında bölünəcək”, - deyə Z.Nuriyev qeyd edib.

Z.Nuriyevun sözlərinə görə, likvidlik probleminin həll edilməsi Azərbaycanda kredit faizlərini də aşağı salmaq imkanı yaradıb: “Hazırda mikromaliyyə təşkilatları illik təxminən 40%-lə kredit verir. Amma artıq imkanlar yaranıb ki, likvid vəsaitlərin formalaşması hesabına bu faizlər aşağı salınsın. Əvvəllər bank sektorunun qarşısında duran məsələ bank sektoruna vəsait cəlb edilməsi idisə, hazırda prioritet bu vəsaitlərin sərfəli şərtlərlə ölkə iqtisadiyyarına ötürülməsidir”.