Cadenza Contemporary Orchestra “Yaddaş 2” adlı növbəti konsertini keçirdi VİDEO FOTO

Kriminal 23 Fev 2023 17:54:00 389 0

Cadenza Contemporary Orchestra 21 fevral tarixində Beynəlxalq Muğam Mərkəzində "Yaddaş 2" adlı növbəti konsertini keçirib. Xocalı soyqırımına həsr olunan konsertdəOrxan Həşimovun "Violin və solo piano üçün musiqi", Fərhəng Hüseynovun "Stabat Mater", Qalib Məmmədovun "Simli kvartet", Ayaz Qəmbərlinin "Miniatür", Tahir İbişovun "Epitafiya" və Azər Hacıəskərlinin "613.1992" əsərləri ifa olunub. Konsertin əsas məqamlarından biri uzun illərdir əsərləri ifa olunmayan, yaradıcılığı ilə özünəməxsusluq qazanmış Fərhəng Hüseynovun ən son 1998-ci ildə səslənmiş "Stabat Mater" əsəri oldu. Bütün tarixi dövrlərdə dünya bəstəkarlarının müraciət etdiyi bu məşhur Bibliya mətni və ecazkar Fərhəng Hüseynov üslubu solist Fəridə Məmmədovanın 25 il sonrakı ifasında dinləyənləri həm Xocalı soyqırımının, həm də son günlərin ağır mənzərəsinə köklədi. Qalib Məmmədovun müəllimi Qara Qarayevə ithaf etdiyi "Simli kvartet"in kövrək melodik hekayəsi, Ayaz Qəmbərlinin 2019-cu ildə yazdığı "Miniatür" triosuna hopmuş orta əsrlərin miniatür sənətinin fəlsəfəsi dinləyicini konsertin kuliminasiyasına hazırlayırdı.

Bu xəbəri də oxu: Polis əməliyyatlar keçirdi Çox sayda saxlanılan var FOTO

Epitafiya...Tahir İbişovun tam 1 il öncə Cadenza Contemporary Orchestra ifasında dinləyici ilə görüşən və unudulmayan əsəri yenidən səsləndi. Əsər ilk olaraq, II Qarabağ müharibəsində həlak olan mülki vətəndaşlara həsr olunsa da bu konsertdə həm Xocalıda vəhşicəsinə qətlə yetirilən, həm də Türkiyədə baş verən zəlzələ zamanı həyatını itirən günahsız insanlara ən səmimi ithaf, bəşəriyyət üçün səslənən laylay idi.

Konsertin kuliminasiyası isə Azər Hacıəskərlinin "613.1992" əsəri oldu. Bu ağır, simvollarla dolu kompozisiya Xocalı soyqırımının bütün kodlarını musiqi tariximizə bir daha həkk etdi. Əvvəlcə səhnədəki 26 ifaçının səsləndirdiyi Xocalı sakinlərinin bioqrafiyası, daha sonra fasiləsiz qlissandolar və o dəhşətli əsirilikdən xilas olmuş Dürdanə Ağayevanın səsi eşidilir. Yenidən orkestr ifası bu səsi boğmağa çalışır. Bu, Xocalı həqiqətinə, misilsiz qətliama 31 ildir susan dünya birliyinə bəstəkar etirazı idi.

İnformasiya dəstəyi - Trend.Az, Day.Az, Son.az, Azernews.Az