Bu fikirləri SƏS TV-yə müsahibəsində Trend BİA-nın Baş direktor müavini, siyasi ekspert Sahil Kərimli bildirib.

O, əlavə edib ki, Prezident İlham Əliyevin Birləşmiş Ərəb Əmirliklərinə səfəri, ardınca isə Davos İqtisadi Formu çərçivəsində keçirdiyi görüşlər, dünyanın nüfuzlu siyasi liderləri, nəhəng şirkətlərin rəhbərləri ilə təmasları bu baxımdan böyük əhəmiyyətə malikdir.

"BƏƏ-də keçirilən görüşlər ölkəmizin enerji potensialının dünyaya çatdırılması üçün geniş imkanlar açacaq. Prezident İlham Əliyev beynəlxalq platformalarda yeni tərəfdaşlarla görüşür, resurslarımızı dünyaya tanıdır və Azərbaycanın iqtisadi imkanlarının daha da artırılması üçün əzmlə çalışır. Bütün bunlar nəticə etibarı ilə ölkəmizin gəlirlərinin artırılmasına zəmin yaradır", - deyə S.Kərimli əlavə edib.

S.Kərimli onu da bildirib ki, bu günlərdə Davosda baş tutan görüşlər də Azərbaycanın iqtisadi imkanlarını, çoxşaxəli resurslarını bir daha dünyaya tanıtdı, ölkəmizin biznes maraqlarını təmin etdi.

"Prezident İlham Əliyev hər il olduğu kimi bu dəfə də xeyli sayda tanınmış şirkətlərin rəhbərləri ilə görüşlər keçirdi, danışıqlar apardı. Bu şirkətlərin əksəriyyəti uzun illərdir ki, Azərbaycana investisiyalar qoyur, ölkəmizdə fəaliyyət göstərərək iqtisadi inkişafa töhvə verir. Son illər Azərbaycanda iqtisadi sferada aparılan dərin islahatlar, biznes mühitinin yaxşılaşdırılması, şəffaflaşdırlılması, münbit investisiya mühitinin yaradılması əlbəttə ki, ölkəmizə olan marağı daha da artırır. Beynəlxalq investorlar Azərbaycana daha çox sərmayə yatırmağa can atır. Şübhəsiz ki, bütün bunlar Prezident İlham Əliyevin düşünülmüş siyasəti nəticəsində mümkün olub. Dövlət başçımızın Davosda keçirdiyi görüşlər Azərbaycan iqtisadiyyatının gələcək inkişafı, şaxələndirilməsi üçün mühim rol oynayır", - deyə S.Kərimli vurğulayıb.

Siyasi şərhçi daha sonra qeyd edib ki, Davos İqtisadi Forumu xarici iqtisadi əlaqələr üçün unikal platformadır:

"Azərbaycan uzun illərdir ki, bu platformadan məharətlə istifadə edərək çox böyük iqtisadi dividentlər əldə edir, öz imkanlarını dünyaya tanıdır. Əminliklə demək olar ki, son təmaslar xarici ticari əlaqələrimizi genişləndirəcək, ölkəmizə yeni investisiyalar gətirəcək", - deyə S.Kərimli əlavə edib.