Tramp bu açıqlamanı, Ukrayna Prezidenti Volodimir Zelenski də daxil olmaqla Avropa liderlərini Ağ Evdə qəbul etdikdən bir gün sonra verib. O, müharibəni sona çatdırmaq üçün çalışdığını və bunun ona şəxsi mənada da fayda gətirə biləcəyini qeyd edib.

"Əgər mən hər həftə 7,000 nəfərin öldürülməsinin qarşısını ala bilsəm, düşünürəm ki, bu kifayət qədər yaxşıdır - əgər mümkündürsə, cənnətə getmək istəyirəm. Eşidirəm ki, vəziyyətim yaxşı deyil. Həqiqətən ən aşağı pillədəyəm," - Tramp zarafatla deyib.

"Ona görə də, əgər cənnətə getsəm, səbəblərdən biri də bu olacaq," - o əlavə edib.

Trampın seçki kampaniyasında verdiyi vədlərdən biri Rusiya və Ukrayna arasında sülhə nail olmaq və müharibəni bitirmək idi. Bu müharibə Rusiyanın Ukraynaya təcavüzündən bəri üç ildən çoxdur davam edir. Son vaxtlar isə Tramp, Nobel Sülh Mükafatını qazanmaq istədiyini və bir neçə ölkə arasında gərginliyi azaltmaq istiqamətində göstərdiyi səylərə görə buna layiq olduğunu bildirib.

Lalə Qüdrətova Son.az