Qazaxıstan AZAL-ın təyyarə qəzası ilə bağlı təfərrüatı açıqlayıb.

Son.az bu barədə Anadolu Agentliyinə istinadla xəbər verir.

Qazaxıstanın Nəqliyyat Naziri Marat Karabayev Aktau şəhəri yaxınlığında qəzaya uğrayan Azərbaycan təyyarəsinin idarəetmə sistemlərinin Qazaxıstan hava məkanına daxil olmamışdan əvvəl sıradan çıxdığını bildirib.

Qazax rəsmiləri Aktau şəhərində baş verən təyyarə qəzası ilə bağlı mətbuata açıqlama veriblər. Qazaxıstanın Nəqliyyat Naziri Karabayev Bakı-Qroznı reysini həyata keçirən, AZAL-a məxsus Embraer 190 tipli təyyarənin Aktau şəhəri yaxınlığında qəzaya uğraması ilə bağlı xronologiyanı təqdim edib.

Karabayev ilk siqnalın Qazaxıstan vaxtı ilə saat 10:43-də Rusiyanın Rostov hava nəzarət mərkəzinin əməkdaşları tərəfindən alındığını və həmin siqnalda Mahaçqala və Bakıda əlverişsiz hava şəraiti səbəbilə onların Qazaxıstanın Aktau şəhərinə uçmağa qərar verdiyini bildirib.

Karabayev əlavə edib ki, təyyarə Qazaxıstan hava məkanına daxil olmamışdan əvvəl idarəetmə sistemlərini itirib. "Saat 10:53-də Rostov uçuş rəhbəri Aktau uçuş rəhbərinə təyyarənin sərnişin kabinəsində oksigen balonunun partladığını, sərnişinlərin huşunu itirdiyini və eniş zamanı tibbi müdaxilə tələb edildiyini bildirib," deyə Karabayev qeyd edib.

Bundan sonra Aktau hava limanında təcili yardım qruplarının hazır vəziyyətə gətirildiyini bildirən Karabayev, "Saat 11:02-də təyyarə pilotları Aktau hava limanının qülləsindəki hava nəqliyyatı əməkdaşı ilə əlaqə qurdu. Əməkdaş, təyyarənin enişi üçün lazım olan bütün tədbirləri təmin etdi. Pistlə vizual əlaqə yaradılması üçün işıqlar yandırıldı," deyə qeyd edib.

Karabayev bildirib ki, heyət eniş üçün 2 cəhd edib, lakin bu müddətdə yüksəklik itkisi və trayektoriyada qeyri-sabitlik müşahidə olunub. Saat 11:28-də heyətlə əlaqə kəsilib və təyyarənin yerə çırpıldığı bildirilib.

Təyyarənin iki qara qutusu tapılıb

Aktau Regional Nəqliyyat Prokuroru Abılaybek Ordabayev hadisə yerində araşdırmaların davam etdiyini açıqlayıb. Ordabayev qeyd edib ki, araşdırmalar Azərbaycan ilə əməkdaşlıq çərçivəsində aparılır. Təyyarədən sağ qalanların və qəzanın şahidlərinin ifadələri alınıb, təyyarənin qalıqları daxil olmaqla dəlillərin toplanması davam edir.

Hadisə yerinin 4000 kvadratmetrlik geniş bir ərazi olduğunu bildirən Ordabayev təhlükəsizliyin təmin edilməsi üçün ərazinin hasarlandığını və təyyarənin iki qara qutusunun da tapıldığını qeyd edib. Ordabayev həmçinin qəzada həyatını itirən 38 nəfərdən 9-nun şəxsiyyətinin müəyyən edildiyini bildirib.

Qeyd edək ki, Bakı-Qroznı reysini həyata keçirən, AZAL-a məxsus Embraer 190 tipli təyyarə 25 dekabrda Qazaxıstanın Aktau şəhəri yaxınlığında qəzaya uğrayıb. AZAL təyyarədə 5 nəfərlik heyət və 62 sərnişin olmaqla, ümumilikdə 67 nəfərin olduğunu açıqlayıb.Qəza nəticəsində 38 nəfərin həyatını itirdiyi, 29 nəfərin sağ qaldığı bildirilib. Qəzaya səbəb kimi təyyarənin "Pantsir-S" hava müdafiə sistemi ilə hücuma məruz qalması göstərilir.

Bəxtiyar Umarlı Son.az