Son.az "HaberTürk"ə istinadla xəbər verir ki, Lüks moda evi "Prada", yeni dizaynı ilə podyumların sərhədlərini aşaraq kosmik səyahətə hazırlaşıb.  

İtalyan moda nəhəngi Ay missiyasında iştirak edəcək NASA astronavtları üçün, xüsusilə Kristina Kox üçün hazırladığı kosmos geyimlərini yaxın zamanda təqdim edib.  

"Prada" bu dizaynı "Axiom Space" adlı kosmos infrastruktur şirkəti ilə birlikdə hazırlayıb. Geyim, kosmosun sərt şəraitinə dözümlü şəkildə dizayn olunub.  

Dizayn yalnız vizual estetikadan ibarət deyil, həm də qarşıdakı missiya üçün yüksək performans, dayanıqlılıq və uyğunlaşma qabiliyyəti ilə seçilir.  

Yeni nəsil kosmos geyimində "Prada"nın imza xüsusiyyəti olan qırmızı xətli estetikaya yer verilib. Güclü yaradıcılıq elementləri nəzərə çarpır, amma dizayn hələ də 50 il əvvəl "Apollo" astronavtlarının geyindiyi klassik xüsusiyyətləri özündə saxlayır.  

"Prada"nın astronavt geyimi çətin testlərdən uğurla keçdi

"Prada" tərəfindən dizayn edilən qoruyucu geyimin ağ xarici qatmanı, Cənub Ay Qütbünün ekstremal temperaturlarına qarşı istiliyi əks etdirmək üçün xüsusi olaraq hazırlanıb. Həddindən artıq çətin hava şəraitində tam qoruma təmin etmək məqsədilə yüksək dəqiqliklə dizayn edilən bu geyim test mərhələlərini uğurla tamamlayıb.  

"Prada", ilk kosmos geyimini hazırlayan "yüksək moda markası" olsa da, kosmosa çıxan ilk marka deyil. Kosmik tədqiqatların və yarışların gələcəyi artıq yalnız hökumət dəstəyi ilə məhdudlaşmır.  

Yenilikçi özəl şirkətlərin yüksəlişi və kosmik turizmin böyük inkişafı kosmosun artıq hamıya açıq olması deməkdir.  

Bəs indiyədək markalar kosmik səfərlər üçün nələr dizayn ediblər?

1. "Ay saatı"  

"Omega", kosmosa çıxan ilk marka kimi tarixə düşüb. "Ay saatı" adı ilə tanınan bu marka, kosmosda olmaq üçün "Rolex" və "Longines-Wittnauer" ilə rəqabət aparsa da, qalib "Omega" olub.  

"Apollo" proqramı tərəfdaşlığını hansı markanın qazanacağına qərar vermək üçün saatlar yüksək temperatur, təzyiq, rütubət, cazibə qüvvəsi, sürətlənmə və yavaşıma kimi çətin testlərdən keçirilib. Nəticədə, 1 mart 1965-ci ildə "Omega Speedmaster" astronavtların saatı kimi təsdiqlənib.  

2. Gözəllik serumu

"NASA"nın Beynəlxalq Kosmik Stansiyasında işgüzar təşəbbüsləri təşviq etmək səylərinin bir hissəsi olaraq, qlobal gözəllik markası "Estee Lauder" cildin qorunması üçün nəzərdə tutulmuş "təkmilləşdirilmiş gecə serumu"nu kosmosa göndərib.  

Kosmik stansiyaya təxminən 10 şüşə "Estee Lauder" brendinə aid dəriyə qulluq serumu göndərilib və "NASA" astronavtları məhsulu stansiyanın mikroqravitasiya mühitində kameraya çəkiblər. Marka, çəkilişi həyata keçirən astronavtlar da daxil olmaqla bütün layihə üçün "NASA"ya cəmi 128 min dollar ödəyib.  

3. İdman avtomobili

İlon Maskın sahibi olduğu "Tesla" şirkəti 2018-ci ildə istehsal etdiyi idman avtomobilini kosmosa göndərdi. "Falcon 9" raketi ilə kosmosa buraxılan və hələ də kosmosun boşluğunda hərəkət edən "Tesla Roadster" modeli avtomobil, yük kimi "SpaceX" geyimi ilə geydirilmiş və Devid Bovinin (David Bowie) klassik hitinə istinad edilərək "Starman" ləqəbi verilən bir manekenlə birlikdə göndərilib.  

2035-ci ilə qədər heç bir planetin yaxınlığından keçməyəcəyi proqnozlaşdırılan avtomobilin 2047 və 2050-ci illərdə Yerə bir neçə milyon kilometr məsafədən uçacağı ehtimal edilir. Araşdırmalara əsasən, avtomobilin 15 milyon il ərzində Yerə çırpılma ehtimalı təxminən 22 faizdir.  

Avtomobilin ölçüsü və keçdiyi səyahət səbəbindən bu buraxılış "Tesla" və "SpaceX" şirkətlərinin möhtəşəm bir marketinq addımı kimi qiymətləndirilib. Şübhəsiz, Maskın bu iki şirkəti sayəsində kosmos sənayesi ilə əlaqəsi bu cür layihələri həyata keçirməyi asanlaşdırmış kimi görünür.  

4. Paraşütlə tullanma ("Skydiving")

Özünü kosmosdan dünyaya tanıdan başqa bir marka isə "Red Bull" oldu. 2012-ci ildə Yer səthindən 39 kilometr yüksəklikdən sərbəst tullanış edən avstriyalı paraşütçü Feliks Baumqartner (Felix Baumgartner), indiyədək ən böyük və uğurlu marketinq kampaniyalarından birinin iştirakçısı oldu.  

"Red Bull", Baumqartnerin kosmosdan sərbəst tullanış edərək üç dünya rekordunu qırması üçün tibb, elm və mühəndislik sahəsində dünyanın aparıcı mütəxəssislərini bir araya gətirdi. 2005-ci ildə başlayan layihə, 14 oktyabr 2012-ci ildə yalnız 10 dəqiqə davam edən tullanışa qədər 8 il davam edən intensiv iş, yenilik, araşdırma və sınaq mərhələlərini əhatə etdi. Bu müddətdə Baumqartner 833,9 km/saat sürətlə irəliləyərək səs sürətini aşdı və indiyə qədər ən yüksək sərbəst tullanma və ən uzun sərbəst tullanma rekordlarını qırdı.  

"Red Bull Stratos" adlı bu layihə, yalnız "YouTube"da canlı yayım zamanı eyni vaxtda 8 milyon baxış əldə etməklə kifayətlənmədi, həm də aviasiya təhlükəsizliyinin artırılması, yüklərin bərpası üçün yeni standartlar təyin edən helium şarlarının və paraşüt sistemlərinin istifadəsi sahəsində mühüm araşdırmalara səbəb oldu.  

"Red Bull" sübut etdi ki, yenilik yaratmaq və uğur qazanmaq üçün yalnız kosmos sektorunda fəaliyyət göstərən bir şirkət olmaq zəruri deyil.  

5. Şokolad

Feliks Baumqartnerin tullanışı bir şokolad markasının da kosmosa çıxmasına imkan verdi.  

"KitKat" markası, şokolad barlarından birini Baumqartnerin tullanışından bir neçə saat əvvəl bir meteoroloji şara və "GoPro" kamerasına bağlayaraq kosmosa göndərmək qərarına gəldi.  

Çəkilən görüntülər "YouTube" platformasında yayımlandı. Bu reklam, ideyanın irəli sürülməsindən icrasına qədər yalnız 24 saat keçən uğurlu bir marketinq kampaniyası olaraq tarixə düşdü./valyuta.az