Son.az bizim.media-ya istinadən xəbər verir ki, bu barədə qondarma qurumun "dövlət naziri" Ruben Vardanyan özünün Facebook səhifəsindəki dünənki paylaşımında deyib.

O bildirib ki, son 1 ayda Xankəndi və digər ermənilərin yaşadığı ərazilərdə ərzaq qıtlığı yaranıb. Ona görə də yerli qurumlar sərt tədbirlər həyata keçirmək zorunda qalıb.

Vardanyanın bu şou-müraciəti əslində siyasi məqsədlər daşıyır.

Birincisi ona görə ki, Vardanyan iddia edir ki, "humanitar böhran" dekabrın 12-dən sonra yaranıb. Yəni, azərbaycanlıların Şuşa-Xankəndi yolunda dinc aksiyaya başlamalarından sonra vəziyyət "pisləşib". Halbuki, aksiyanın davam etdiyi 1 aya yaxın müddətdə "humanitar dəhliz" bağlanmayıb. Əksinə, hər gün ən azı 15-20 yük avtomobili Xankəndinə buraxılır. Bu da 20-30 min əhalinin ərzaq təminatı üçün kifayət qədər böyük daşımadır.

İkincisi, Vardanyan bu addımı atmaqla Xankəndindəki "humanitar böhranı"  beynəlxalq aləmin diqqətinə çatdırmaq istəyir. Yəqin ki, yaxın günlərdə Fransa, Rusiya və erməni diasporunun güclü olduğu ölkələrdə Azərbaycana qarşı çirkin kampaniya başlayacaq.

Üçüncüsü, separatçılar bunu Şuşa-Xankəndi yolunda davam edən humanitar aksiyaya adekvat addım kimi görür. Guya azərbaycanlılar aksiyanı davam etdirəcəkləri təqdirdə Qarabağdakı ermənilər də dinc dayanmayacaqlar.

Təsadüfi deyil ki, Qarabağda talon sisteminə keçirilməsi xəbərini Ermənistan mətbuatı artıq neçə gündür ki, manşetlərə daşıyıb.

Bu da onu göstərir ki, Vardanyanın bu addımı rəsmi İrəvanla və xaricdəki maraqlı qüvvələrlə razılaşdırılıb.

Hədəf də odur ki, onlar bu addımları ilə dünya ictimaiyyətinə çatdırmaq istəyirlər ki, guya Azərbaycan Qarabağı blokadaya alıb və dinc əhalini çörəklə sınağa çəkir. Beləcə, separatçılar Azərbaycanı dünyanın qınağına tuş gətirmək istəyirlər.  

"Qarabağ klanı"na total hücum

Lakin, burda bir maraqlı məqam da var. Vardanyan məlum müraciətində bəzi erməniləri iqtisadi sabotajda ittiham edib. Beləki, o bildirib ki, bəzi imkanlı erməni benzini evlərində gizlədərək ancaq öz yaxınlarının istifadəsinə verirlər, bir çox mağaza sahibi isə malları məqsədli şəkildə gizlədir və sair. Məlum olduğu kimi hazırda separatçılara faktiki olaraq Vardanyan rəhbərlik edir.

O da öz yerini möhkəmlətmək məqsədi ilə "Qarabağ klanı"nı neytrallaşdırmaq istəyir. 3 gün öncə "Qarabağ klanı"nın ən son liderlərindən biri olan Balasanyan vəzifəsini itirdi. Lakin, onun ermənilər arasında kifayət qədər təsir imkanları var. Vardanyan son addımı ilə Balasanyan kimiləri "iqtisadi sabotajçı" kimi "ifşa" etmək istəyir. Bu hesaba da separatçıların vahid lideri olmağa nail olmaq istəyir.

O öz qərarlarını Paşinyanla da razılaşdırır.

Çünki, erməni baş nazir də "Qarabağ klanı"ndan qurtulmaq istəyir. Təsadüfi deyil ki, Yeni ilin ilk günündə erməni mətbuatı belə bir məlumat yaydı ki, Vardanyan Paşinyana 150 milyon dollar ianə edib.

Bütün bunlarsa onu göstərir ki, Robert Vardanyanın həm dünənki videomüraciəti, həm də bu günkü talon qərarının konkret hədəfləri var. Bunun birinci hədəfi Azərbaycana qarşı yeni qarayaxma kampaniyasıdırsa, ikinci məqsədi "Qarabağ klanı"nın sonunu gətirməkdir.