Əndəlüs klubunun baş məşqçisi Xulen Lopeteqi qrupun son 3 oyununda ehtiyat qüvvəyə şans vermək niyyətindədir.

İlk 3 turda qələbə qazanan və növbəti mərhələyə vəsiqəni, demək olar ki, təmin edən Sevilla-da çalışdırıcı əsas heyət üzvlərini La Liqa oyunları üçün qoruyacaq. Həmkarlarımız Lopeteqinin avrokubokdan arxayın olduğu və bu üzdən sıx təqvimi nəzərə alaraq, bütün diqqəti çempionat görüşlərinə yönəldəcəyini vurğulayıb.

Baş məşqçi, xüsusən də, hücum xəttində rotasiyalar edəcək. Təcrübəli mütəxəssis artıq əsas heyət üzvünə çevrilən Xavyer Ernandesi qrup mərhələsinin son 3 görüşündə oynatmayacaq. Bu isə o deməkdi ki, Çiçarito həm Dudelange, həm Qarabağ, həm də APOEL-lə qarşılaşmada meydana çıxmayacaq. Lopeteqi meksikalı forvardın xidmətindən bu dönəmdə yalnız La Liqa matçlarında yararlanacaq.

Qeyd edək ki, Sevilla noyabrın 7-də qrupun növbəti turunda Dudelange-ın qonağı olacaq. Çiçarito isə ilk iki turda Qarabağ və APOEL-lə qarşılaşmada fərqlənib.