Avropa nəhənglərinin istədiyi futbolçunu 7 milyon avroya aldılar
İdman 18 Apr 2019 17:43:00 287 0
Almaniyanın Eintracht klubu Portuqaliyanın Benfica klubundan icarə götürdüyü Luka Yoviçin transfer hüquqlarını satın alıb.
Goal.az xəbər verir ki, bu barədə Frankfurt təmsilçisinin rəsmi saytı məlumat yayıb.
Yoviç 2017-ci ilin yayında iki illik icarəyə götürülmüşdü. Lakin o, Almaniyada uğurlu çıxışı ilə Avropanın aparıcı klublarının diqqət mərkəzinə düşdüyü üçün, Eintracht serbiyalı futbolçunu birdəfəlik transfer etməyə qərar verib.
Benfica-ya 7 milyon avro təzminat ödəyən Bundesliqa təmsilçisi, Yoviçlə 2023-cü ilədək müqavilə imzalayıb.
Yoviç bu mövsüm Bundesliqada 27 matçda 17 qola imza atıb, 6 məhsuldar ötürmə müəllifi olub. O, Avropa Liqasında 11 oyuna 8 qol, 1 məhsuldar ötürmə ilə yadda qalıb.
Serbiya yığmasının da şərəfini qoruyan gənc futbolçu ilə İspaniyanın Real, Barcelona, İtaliyanın İnter və Juventus, Almaniyanın Bayern Munich klublarının maraqlandığına dair iddialar səslənməkdədi.