Ötən ilin bu günü Ermənistan silahlı qüvvələrinin diversiya qrupları sutkanın qaranlıq vaxtında ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirib. Bu əməllərin qarşısının dərhal alınması məqsədilə döyüş toqquşması baş verib.

Azərbaycan növbəti dəfə Ermənistanın hərbi-siyasi təxribatına məruz qalaraq cavab vermək və öz təhlükəsizliyinin təmin olunması üçün adekvat addımlar atmaq məcburiyyətində qaldı. Nəticədə Azərbaycanın təhlükəsizliyinə təhdid yaradan bütün hərbi təyinatlı obyektlər darmadağın edildi, Azərbaycan çox mühüm yüksəklikləri nəzarətə götürdü. Ermənistanın xeyli sayda hərbi texnikası, milyarddan artıq dəyəri olan iki S-300 raketi, rəsmi məlumata görə 224, əslində isə 400-dən artıq canlı qüvvəsi, çoxlu sayda hərbi obyekti və onlarla postu məhv edildi. Bütün bunlar cəmi 7 saat ərzində baş verdi. Bu döyüş nəticəsində Ermənistanın planları alt-üst oldu, cəhdlləri uğursuzluqla nəticələndi. 

Müdafiə Nazirliyindən verilən məlumata görə 2022-ci il sentyabrın 12-dən etibarən Ermənistan silahlı qüvvələrinin törətdiyi genişmiqyaslı təxribatların qarşısının alınması zamanı Azərbaycan Ordusunun 71 hərbçisi şəhid olub. Azərbaycan əsgəri qəhrəmanlıq, şücaət, igidlik göstərərək vətəninə qarşı istənilən addımın, təxribatın qarşısını almaq qüdrətində olduğunu bütün dünyaya nümayiş etdirdi. Şəhidlərimizin qisası artıqlaması ilə alındı və onların qanı yerdə qalmadı.

Mövcud vəziyyətlə əlaqədar olaraq sentyabrın 13-də prezident, Ali Baş Komandan İlham Əliyev Azərbaycan Respublikası Silahlı Qüvvələrinin rəhbər heyətinin iştirakı ilə operativ müşavirə keçirib. Müşavirədə aidiyyəti üzrə məruzələr təqdim edilib, Ermənistan silahlı qüvvələrinin iki dövlətin sərhədində törətdiyi təxribatların qarşısının alındığı, bütün müvafiq vəzifə və tapşırıqların yerinə yetirildiyi bildirilib. Qeyd olunub ki, yaranmış gərginliyin məsuliyyəti tam şəkildə Ermənistanın siyasi rəhbərliyinin üzərinə düşür.

Ermənistan sülh danışıqlarından hələ də boyun qaçırır. Onlar regionda təhlükəsizliyini təmin olunması istiqamətində irəli sürülən bütün təşəbbüslərə və atılan addımlara zərbə vurur. Ermənistan bu kimi təxribatlarına dəfələrlə layiqli cavab almasına baxmayaraq hələ də nəticələrdən dərs çıxarmır, sülhdən yayınaraq mövqelərimizi atəşə tutmağa davam edir.

İslam Son.az