Müəlliflərin gözündə necə göründüyü ancaq onlara məlumdur. Reallıqda necə olacağını isə hələlik yəqin ki, heç kəs bilmir. Lakin hər halda bir şey dəqiqdir: onu müharibələrin və təcavüzün köməyilə yaratmaq olmaz.

Münxen Təhlükəsizlik Konfransı Davos İqtisadi Forumu kimi digər beynəlxalq qeyri-rəsmi forumlarla yanaşı, məhz mövqelərin yoxlanıldığı, bu və ya digər ölkələrin liderlərinin fikirləri ilə tanış olunduğu və bu ən yeni qlobal nizamın təməlinin pillə-pillə qoyulduğu platformadır.

Münxen konfransının sədri Kristof Hoysgen konfransın ilk günü onun "qaydalara əsaslanmış siyasəti dəstəkləyən forum olduğunu" qeyd edib.

Bu qeydi beynəlxalq hüquq nöqteyi-nəzərindən nüfuzu qüsursuz olan ölkəmizə tam anlamında aid etmək olar və danılmaz bir üstünlükdür.

Bununla belə, üç Cənubi Qafqaz dövlətinin başçılarının iştirak etdiyi panel müzakirəsində moderator qismində çıxış edən Hoysgen son dərəcə həyasız bir müqayisə apardı: "biz zəlzələ zonasında [Türkiyədə] humanitar vəziyyətdən danışırıq, lakin bizi həm də blokadaya alındığı görünən Laçın dəhlizindəki humanitar vəziyyət də narahat edir".

Belə bir əlverişli "pas" alan erməni lideri Paşinyan tam beş dəqiqə danışdı və bununla belə yeni və həqiqətə uyğun heç nə demədi: "bəli, haqlısınız, Laçın dəhlizi artıq 70 gündür ki, bağlıdır, Dağlıq Qarabağ blokadadır, oraya elektrik enerjisi və qaz ötürülmür" və s.

O həmçinin bu gün Qərbin Rusiyaya qarşı münasibətini bildiyindən, 10 noyabr 2020-ci il tarixli Üçtərəfli Bəyanata əsasən Laçın dəhlizinin fəaliyyətinin rus sülhməramlı kontigenti tərəfindən təmin edilməli olduğunu deyərək bununla Azərbaycan və Rusiyanın əlbir olduğuna eyham edib.

Ermənistan lideri başqa nələrdən danışdı? Öz ölkəsində demokratiyanın və müstəqil məhkəmə sisteminin qurulmasından, Azərbaycan tərəfin təhqir və revanş siyasəti apardığından, ermənilərin Qarabağda məscidləri dağıtmasını nəzərdə tutaraq müzakirə olunan məsələlərə dini kontekstin daxil edilməsinin təhlükəli olduğundan.

Bir sözlə, Paşinyanın da komandası "yaxşı çalışıb". Doğru və ya yalan olmasından asılı olmayaraq, əllərinin altında olan hər şeydə Azərbaycanı ittiham etdilər.

Qısacası, bunlar erməni baş nazirinin növbəti çarəsiz çırpınışları idi.

Allah şahiddir ki, mən öz Prezidentimizi fövqəlinsan kimi qələmə vermirəm, lakin deməliyəm ki, o hesabında yalnız ölkələrinin şanlı tarixləri olan bir çox dünya liderini çoxdan geridə qoyub.

Azərbaycan Prezidenti məhz lazım olan yerdə böyük qətiyyət nümayiş etdirdi.

Onun Ermənistanın baş naziri ilə moderator vasitəsilə qiyabi müzakirəsi sadə bir postulata gətirib çıxardı: Ermənistana və Azərbaycana uzunmüddətli sülh lazımdır. Müharibələr arasında sülh deyil, gizli düşmənçiliyin olmadığı real sülh.

O, erməni separatçıları tərəfindən Azərbaycan torpağında törədilən çoxlu sayda hərbi cinayətlərə və bəşəriyyətə qarşı cinayətlərə baxmayaraq, bu sülh naminə qarşı tərəfə əlini uzatmağa hazırdır və Prezident müzakirə zamanı bu barədə də qeyd etdi.

Prezident İlham Əliyev həmçinin erməni tərəfinə Ermənistan-Azərbaycan sərhədində birgə nəzarət buraxılış məntəqələri yaratmağı təklif etdi.

Beləliklə, dünya Azərbaycan və Ermənistan rəhbərlərinin mövqelərini bir daha eşitdi və əmin oldu ki, rəsmi Bakı hansısa müqavimətə baxmayaraq, sülh sazişi bağlanması məsələsini sonadək aparmaq niyyətindədir.

Yeni qarşıdurma mənasızdır, Cənubi Qafqazda sülh isə yeni imkanlar yaradacaq və bu kontekstdə Azərbaycanın mövqeyi yeni dünya nizamının qurucularının maraqlarına cavab verir.

TREND