Budəfəki müsahibimiz Asiya İnkişaf Bankının (AİB) Baş direktoru və sektorlar üzrə Qrup rəhbəri Rameş Subramaniamdır.

Rameş Subramaniam COP29 çərçivəsində Trend-ə özəl müsahibəsində konfransın diqqətinin getdikcə ekoloji bacarıqların inkişafı və "yaşıl" iş yerlərinin yaradılmasına yönəlməsindən məmnun olduğunu bildirib.

"Bizə ekoloji təmiz sektorlarda keyfiyyətli iş yerlərinin yaradılması ilə müşayiət olunan dayanıqlı iqtisadi artıma töhfə verəcək düşünülmüş siyasət və investisiyalar lazımdır. Gözlənilən "yaşıl" iş yerlərinin artımı fonunda COP çərçivəsində aparılan müzakirələr ekoloji bacarıqların inkişafına sərmayələrin artırılması üçün lazım olan təkan ola bilər. Bu bacarıqlar təmiz və ədalətli keçidin təmin edilməsində əsas rol oynayır və gənc nəsillərə əmək bazarında yeni və perspektivli imkanlar açır", - deyə o vurğulayıb.

Təhsil iqlim dəyişikliyinə qarşı mübarizədə əsas vasitə kimi

Baş direktor ilk dəfə keçirilən İnsan İnkişafı Gününün mühüm bir hadisə olduğunu qeyd edib və onun iqlim dəyişikliyi ilə bağlı bilik və bacarıqların təhsil sistemlərinə inteqrasiyası üzrə yeni öhdəliklərin başlanğıc nöqtəsi olacağına ümid etdiyini ifadə edib.

"Biz başa düşürük ki, Asiya-Sakit okean regionunda ən həssas əhali qrupları iqlim dəyişikliyinin təsirlərindən daha çox əziyyət çəkir. Buna görə də gənclər və yerli icmalar üçün iqlim dəyişikliyinə dayanıqlılığın artırılmasına yatırılan investisiyalar bu çağırışlarla mübarizədə əsas elementdir", - deyə R.Subramaniam bildirib.

İqlimə dayanıqlı və aşağı karbonlu məktəblərin təşviqi

Asiya İnkişaf Bankının (AİB) baş direktoru Rameş Subramaniam bildirib ki, AİB məktəblər və digər qurumlar üçün təbii fəlakətlərə dayanıqlı infrastrukturun yaradılması sahəsində mühüm işlər görüb.

"Biz iqlim dəyişikliyi məsələlərinin tədris proqramlarına inteqrasiyası, müəllimlərin təlimi və təhsil bacarıqlarının inkişaf etdirilməsi üzrə səylərimizi artırmağı hədəfləyirik. Məqsədimiz iqlim dəyişikliyi ilə effektiv mübarizə üçün zəruri olan bilik və bacarıqların formalaşdırılmasıdır.