Son.az axar.az-a istinadən xəbər verir ki, bu barədə tarixçi alim, dosent Zaur Əliyev qeyd edib.

O bildirib ki, səhifələri incələyib:

"Özlərini Əhli-Beyt tərəfdarları kimi göstərsələr də, Xomeyni və Sistanini (İraq) özlərinin mənəvi liderləri sayırlar. Bütün statuslar, videolar və xəbərlər bu iki və digər İran din xadimlərinin fikirləri əsasında yazılır və hazırlanır. Onların Teleqram kanalı bu sözlərlə özünü ifadə edir: "Dünya müsəlmanlarının ali dini lideri Ayətullah uzma Seyid Əli Xameneinin həyatını, əsərlərini, çıxışlarını, fəaliyyət və düşüncələrini yaymaq, paylaşmaq. Kanal, Qum elmi hövzəsində təhsil alan bir qrup tələbə tərəfindən fəaliyyət göstərir. Kanalın bütün paylaşımları, Ayətullah Xameneiyə məxsus rəsmi mənbələrdən əldə olunacaqdır".

Dosent onların özlərini niyə məhz "Qaraköynəklilər" adlandırmasına da toxunub:

"Onlar iddia edirlər ki, guya İmam Hüseyn qara köynək geyinib deyə, bunlar da özlərini bu cür adlandırırlar. Amma tarixi və ideologiyaları az-çox oxumuş insana bir neçə yazı oxumaq kifayət edər ki, bunların ideoloji xəttinin nə olduğu üzə çıxsın. İlk dəfə tarixdə "Qaraköynəklilər" adı ilə dəstə İtaliyada Mussoloni tərəfindən yaradılıb. Narazı xalq kütlələrini güc yolu ilə susdurmaq üçün xüsusi dəstələr yaratdılar. Onlardan biri də Benito Mussolininin yaratdığı "Faşist mübarizə dəstələrinin ittifaqı" idi. Onlara "Qaraköynəklilər" də deyirdilər. Bu gün də İtaliyada 60 mindən çox üzvü olan "Qaraköynəklilər"in ideoloji xəttini İranın Azərbaycanda yaratdığı bu terror qrupunda görmək olar. Onların yazılarında din təbliğatı altında faşizm ideyası aşkar görünür. Çox maraqlıdır ki, İtaliyadan öncə "Qaraköynəklilər" kimi radikal erməni millətçiləri, xüsusilə də Qaregin Njde tərəfdarları geyinirdilər. Ermənistan Respublika Partiyasının "Qaregin Njde və onun təlimi" adlı ideoloji broşürünün redaktoru Müşfiq Lalayan onun müqəddiməsində "Tseqakron" hərəkatının ilkin dövrlərinin nasizmlə və faşizmlə müqayisəsinə üstüörtülü də olsa, eyham vurub: "1919-cu ildə Njdeyə müharibə andı içənlər qara köynək geyinib öz sparapetindən kişilik dərsi aldıqları vaxt hələ faşizm və hitlerizm haqda söhbət belə getmirdi".

Yəni İranın yaratdığı bu terror qrupunun mənəvi ataları erməni terroru, İtaliya faşizmi sayıla bilər. Çünki bu terrorçuların geyim tərzi 1919-cu ildə ermənilərin yaratdığı "Tseqakron" hərəkatının geyim tərzi ilə eynilik təşkil edir".

Alimin sözlərinə görə, bunlar 44 günlük müharibə dövründə üzə çıxıblar:

"Şəhid yaşadığı evinə tərəf gətirilərkən qara köynək geyinmiş bir dəstə peydə olur. Uca səslə şüar, filan, ardınca isə iranmeyilli şüarlar... bu "qaraköynəklilər" sanki xüsusi olaraq istiqamətləndirilirdilər və vəziyyətə görə hərəkət edirdilər. Məsələn, əgər dəfndə onlardan başqa məhlə, tanış, qohumlar daha çox olurdusa və ya şəhidlərin şəninə, dövlətçilik, birlik naminə şüarlar səslənirdisə, bir neçə dəqiqədən sonra "qaraköynəklilər" mərasimi tərk edirdilər. Yox, dəfndə onlar sayca üstünlük təşkil edirdilərsə, iranmeyilli şüarlar deyirdilər. Hacı Şahinin dəfni zamanı da Cavid parkı tərəfdən izdihama qoşulan bunlar iranmeyilli şüarlar səsləndirdilər.

Bu gün şəhid ziyarətlərində maksimum ehtiyatlı olmaq lazımdır. Çünki bunların içlərində qadınlar da var və onlar ziyarət adı altında iranmeyilli şüarlar səsləndirirlər. Neçə-neçə belə video sosial mediada qarşımıza çıxıb".

Z.Əliyev daha bir sensasion faktı xatırladıb:

"2020-ci ildə Milli Məclisin qapıları sındırılan zaman (2020-ci ilin iyul ayı, Tovuz döyüşləri zamanı - red.) "qaraköynəklilər" təkbir söyləyərək, caamatı daha içəri daxil olmağa çağırdılar. Bununla bağlı çoxsaylı video-materiallar var, onlarda biri də BUDUR.

Onların sosial mediada statuslarının sonu bu cümlə ilə bitir: "İzzətin nuru ilə nurlanmış qaraköynəkli möminlər".

İranın dəstəyi ilə yaradılan bu terror qrupunun ilk üzvləri həbs edildi. Ancaq sosial mediada izlədiyim qədər bunlara rəğbət edənlər daha çoxdur. Yazılarını paylaşanlar da. Hər birinin sonu mütləq gələcək. Çünki Azərbaycanda güclü təhlükəsizlik olmaqla yanaşı, eyni zamanda, xalqın 90 faizi İrana və onlara rəğbət edən bu cür qaraköynəklilərə terrorçu kimi baxır".