Son.az "Report"a istinadən bildirir ki, Bakı Ağır Cinayətlər Məhkəməsinin hakimi Səyavuş Hacıyevin sədrliyi ilə keçirilən prosesdə şahid qismində Nigar Qasımova (ad, soyadı şərti) ifadə verib.

O bildirib ki, mərhum N.Qalabəyli ilə kafedə işləyən zaman tanış olub:

"Sonra Nurani məni evinə dəvət etdi. Mən isə onun evinə getmək istəmədim. Bu zaman Nurani evə zəng edib həyat yoldaşı Əfsanə ilə danışdı. Ona dedi ki, evə qadın gətirirəm. Mənə evdəkilərin razılıq verdiyini söylədi. Bundan sonra onunlara getməyə razılaşdım. Birlikdə onlara getdik, bizi Əfsanə qarşıladı. Həmin vaxt Əfsanə bildirdi ki, narahatlıq yoxdur, sərbəst ol. Biz birlikdə evdə çay içdik, söhbət etdik. Daha sonra Əfsanə bizə yer saldı. Mən buna razı deyildim. Nurani isə mənə hədə-qorxu gəldi, sonra döyüb barmağımı zədələdi. Məcbur olub onunla razılaşdım".

N.Qasımova deyib ki, növbəti günlərdə N.Qalabəyli ona tez-tez zəng edirmiş. Qadının sözlərinə görə, onun zənglərinə cavab verməyəndə isə ölümlə hədələyirmiş:

"Nuraninin ölüm xəbərini köhnə işlədiyim kafedəki iş yoldaşlarımdan eşitdim. Əvvəlcə onun beyninə qansızması nəticəsində öldüyünü dedilər. Sonradan məlumat əldə etdim ki, Nuranini həyat yoldaşı Əfsanə qətlə yetirib. Mən özüm də ailəliyəm, iki uşağım var. Evdən qardaşımgilə getmək adıyla çıxırdım. Nurani spirtli içki qəbul edəndə özündə olmurdu. Onunla intim münasibətim 3 il davam etdi. Hər dəfə onlara gecələr gedirdim. Həmişə Nuraninin arvadı da, uşaqları da evdə olurdu. Onunla görüşməyəcəyim halda münasibətlərimiz barədə yaxınlarıma, qohumlarına zəng edərək deyəcəyini bildirirdi, məni ərimlə, oğlumla şantaj edirdi".

Təqsirləndirilən şəxs isə söyləyib ki, Nigar onun evinə Nurani üçün digər qadınları da gətirib:

"Bütün bunlar mənim, uşaqlarımın gözünün qarşısında baş verirdi. Etiraz edəndə, döyülürdüm, söyülürdüm. Nurani mənə illərlə zülm eləyib. Zəng eləyirdi ki, hazırlıq gör, evə adam gələcək. Bir də görürdüm ki, evə pozğun qadın gətirdi. O evdə elə dəhşətlər yaşamışam ki..."

Daha sonra şahid qismində Ə.Qalabəylinin qonşusu Namil Nəcəfov dindirilib. O deyib ki, hadisə günü işdən evə qayıdanda binanın blokunun qarşısında Əfsanənin əlində bıçaq olduğunu görüb:

"Mən də bu barədə polisə məlumat verdim. Onlar gəlib qadının əlindən bıçağı aldılar. Hadisə gününə qədər onları tanımamışam".