Son.az Trend-ə istinadən bildirir ki, bunu azərbaycanlı əsirlərə işgəncə verən erməni hərbçiləri Alyoşa Xosrovyan və Lüdvik Mkrtçyanın məhkəmə prosesində zərərçəkmiş Zahid Həsənov deyib. O bildirib ki, 1994-cü ildə 4 əsir Xankəndində saxlanılıb: "Mən, Sergey, Azər Aslanov və digər bir əsir bir yerdə saxlanılırdıq. 5-6 erməni hərbçi gəldi, biri də Xosrovyan idi.

Başladılar bizi döyməyə. Sonra Azər Aslanovu apardılar komandirin otağını təmizləməyə. 2 saatdan sonra Azər gəldi. Sonradan Azəri yenidən apardılar. Ermənistan xüsusi xidmət orqanları onu aparıb gizli söhbətə başladılar. Azəri Samvel Babayanın otağında təlimatlandırdılar. Onu təlimatlandıranlardan biri də Mkrtçyan idi. Bir saatdan çox söhbət apardılar. Onu orda tam təlimatlandırıb buraxdılar. Sonra ermənilər gəldilər ki, otağı Azər yox, Sergey təmizləyəcək. Məlum oldu ki, onlar Azər İsmayılovu ələ alıblar və otağı təmizlətdirməyiblər. Sergey gəldi dedi ki, Azər otaq təmizləməyib. O hadisədən sonra Azərə istədiyi yeməyi verirdilər. Məlum oldu ki, Azər Aslanov ermənilərlə işbirliyinə girib. Həmin il də Azər Aslanov əsirlikdən qayıdıb Bakıda metronu partlatdı. Mən əsirlikdən qayıdandan sonra eşitdim ki, Sergeyi güllələyib öldürüblər".