Hər iki avtomobilin S-modellərinə aid olduğunu bildirən elementlərə misal olaraq, hava girişlərini təqlid edən işləmələr quraşdırılmış bamperləri olan aqressiv kuzov dəstini, radiator barmaqlığı ilə kapotun arasındakı boşluğu, arxa diffuzoru və buraxılış sisteminin dörd çıxış borusunu göstərmək olar. Bundan başqa, sedanın baqaj qapağındakı kiçik spoyler də diqqəti cəlb edir.

Son.az autograph.az-a istinadən bildirir ki, hər iki avtomobildə yan güzgülərin gövdələri kuzov rənginə boyanmışdır. Xatırladaq ki, S modellərində ənənəvi olaraq güzgülər gümüşü rəngli gövdəyə malik olurlar. Çox güman ki, şirkətin bu addımı atmaqda məqsədi prototiplərin ictimai yollarda çox diqqət çəkməməsi üçündür. Eyni səbəbdən, avtomobillər müvafiq emblemlərdən də məhrum ediliblər.

İstehsalçı yeni Audi S3 Sportback hetçbekinin texniki hissəsi barədə artıq məlumat verib. 2,0-litrlik dördsilindrli turbomühərrik əvvəlki kimi 310 at qüvvəsi və 410 Nm fırlanma anı təklif edir. Güc aqreqatı iki muftalı yeddi pilləli S tronic "robotu" ilə tandemdə çalışır. Ayrıca, yeni hetçbek, adaptiv magnetic ride amortizatorları istisna olmaqla sələfinin şassisini tam şəkildə miras alacaqdır. Çox güman ki, bənzər texniki hissəni sedan da əldə edəcəkdir.