Bakı. Azərbaycan Universiteti Bakı Ekspo Mərkəzində keçirilən 13-cü Azərbaycan Beynəlxalq Təhsil sərgisi “EduExpo”da öz stendi ilə təmsil olunur. Stendin yerli və xarici ziyarətçilərinə universitetdə tədris olunan ixtisaslar, tələbələr üçün yaradılan imkanlar, universitetin beynəlxalq əlaqələri və qoşulduğu tələbə mübadilə proqramları, maddi-texniki bazası, elmi fəaliyyəti və uğurları, akademik heyəti, o cümlədən tətbiqinə yeni başlanan kompüter elmləri və kompüter mühəndisliyi ixtisaslarını əhatə edən, Ukraynanın Xarkov Milli Radioelektronika Universiteti ilə birgə beynəlxalq ikili diplom proqramı haqqında məlumat verilir, infomateriallar təqdim olunur, suallar cavablandırılır. Universitetin İnformasiya-kommunikasiya texnologiyaları fakültəsinin tələbələri stenddə qurulmuş “MiniLab”da laboratoriya işləri yerinə yetirirlər. Laboratoriya işləri sərginin yekununda nümayiş etdiriləcək. Stenddə univrsitetin professor-müəllim heyətinin kitab, monoqrafiya və dərs vəsaitləri, İnformasiya-kommunikasiya texnologiyaları fakültəsinin tələbələrinin hazırladıqları robot və elektronika cihazları da nümayiş olunur. Sərginin təqdimat zonasında abituriyent, valideyn və müəllimlər üçün Azərbaycan Universitetinin özəl təqdimatı təşkil olunub.