Son.az APA-ya istinadla xəbər verir ki, Kolumbiyanın Letisiya şəhərində yeddi ölkə arasında bununla bağlı müvafiq müqavilə imzalanıb.

Pakt Kolumbiya, Ekvador, Peru və Boliviya prezidentləri, həmçinin Braziliya, Qayana və Surinamın nümayəndələri tərəfindən təsdiq edilib.

Kolumbiya Prezidenti İvan Duke sənədin imzalanması mərasimində qeyd edib ki, bu pakt onları Amazonu qorumağa, risklərin qarşısını almaq və nəticələrini aradan qaldırmaq üçün səylə işləməyə məcbur edir".

O əlavə edib ki, sazişi imzalayan ölkələr meşələrin məhv edilməsinin səbəbləri ilə, o cümlədən mədən, narkotik ticarəti və kənd təsərrüfatı ərazilərinin qanunsuz genişləndirilməsi ilə də razılaşbılar.

Bundan əlavə, tərəflər elmi sahədə əməkdaşlıq və informasiya mübadiləsi də edəcəklər.

Dukenin sözlərinə görə, region ölkələri bu ilin dekabr ayında Çilinin paytaxtında keçiriləcək BMT-nin İqlim dəyişikliyi üzrə konfransında Amazonun qorunması problemlərini yenidən müzakirə etməyi planlaşdırır.

Qeyd edək ki, ərazisində Amazon meşələrinin yerləşdiyi Venesuela hakimiyyət nümayəndələri tədbirə dəvət olunmayıb.

Xatırladaq ki, Braziliya Milli Kosmik Tədqiqatlar İnstitutunun məlumatına görə, bu ilin ilk yeddi ayında yanğınlar Braziliyada yerləşən 1,8 milyon hektardan çox Amazon meşəsini məhv edib. Genişmiqyaslı meşə yanğınları Boliviya və Paraqvayda da qeydə alınıb.