Son.az oxu.az-a istinadən bildirir ki, qrunt sularının üzə çıxarılması üçün su quyularının qazılması bəşəriyyətin ən qədim və əhəmiyyətini itirməyən kəşflərindən hesab olunur.

Goranboyun Tatarlı kənd sakini Mənsur Nurəliyev də qədim kənkan sənətini elə o dövrlərdə olduğu kimi davam etdirir. O, 15-20, hətta 25 metr dərinliyi olan quyunu bel, ling və külüngün köməyilə qazır.

Dayısından öyrəndiyi peşəni yaşadan usta dərinliklərdə hər adamın işləyə bilmədiyini deyir. Böyük zəhmət bahasına başa gəlsə də, kənkan az vəsaitlə evləri həyat mənbəyi olan su ilə təmin etməyi bacarır.

Mənsur Nurəliyev qazıntını yalnız dekabr-may ayları aralığında aparır. Çünkü isti vaxtlarda yerin altında müəyyən qazlar yaranır ki, bu, işləməyi mümkünsüz edir.

Qədim peşənin müasir ustası sənətinin təhlükəli olduğunu deyir. Amma o, ehtiyatı əldən verməyib işinə davam edir.