.

Son.az xəbər verir ki, Estoniyanın paytaxtı Tallin şəhərində Avropa Jurnalistlər Federasiyasının (AFJ) Baş Toplantısı  keçirilib. 08-11 may  tarixlərində keçirilən, 36 ölkədən  EFJ-yə üzv təşkilatların 90 nəfər təmsilçisinin   qatıldıqları toplantıda  Azərbaycandan  AFJ-nin yerli üzv təşkilatı - Jurnalistlərin Həmkarlar İttifaqı iştirak edib.

JuHİ sədri Müşfiq Ələsgərli bildirib ki, toplantıda öncə AFJ-nin təşkilati məsələləri həll edilib, növbəti 3 il üçün qurumun prezidenti, vitse -prezidenti və idarə heyətinin üzləri seçiliblər. AFJ prezidenti postununa növbəti 3 il üçün təkrarən Moqan Bliçer Bjerqard (Mogens Blicher Bjerregard) seçilib.

Toplantıda AFJ-nin Müəllif hüquqları, Frilanslarla iş, Gender problemləri, Etik standartlar, Təhlükəsizlik və sair məsələlər üzrə komissiyalarının hesabatları dinlənilib. Komissiyaların hesabatları fonunda Avropa qitəsində medianın durumu müzakirəyə çıxarılıb. Müzakirələrin gedişində  bəlli olub ki, Qitənin media sahəsində problemləri kifayət qədər çoxdur: "Maliyyə institutlarının, reklam verən təşkilatların öz layihələrini təmin etmək üçün ənənəvi mediaya deyil, yeni mediaya, sosial şəbəkələrə  üstünlük vermələri peşəkar medianı çıxılmaz duruma salıb. Maliyyə mənbələrinin daralması  peşəkar medianın imkanlarını tükədir, bu isə qeyri-standart xəbər istehsalçılarının mövqelərinin möhkəmlənməsinə şərait yaradır;  ənənəvi xəbər standartları sıradan çıxarılır, gündəm yalan xəbərlə (Fake news) dolur". Baş Toplantı iştirakçılarının yekdil fikri bu olub ki, "Fake news"la mübarizənin ən sadə yolu, peşəkar medianın imkanlarının artırılmasına bağlıdır.

AJF adından Avropa Parlamenti üzvlüyünə namizədlərə, 19 may seçkilərinə qatılacaq naizədlərə  müraciət edilib. Onlardan öz seçki platformalarına peşəkar medianın imkanlarının artırılması üçün maddələr əlavə etmək istənilib. Toplantı adından qərar verilib ki, bu yöndə çalışmalar davam etdirilsin. Baş Toplantıda, həmçinin, vurğulanıb ki, Avropa məkanında peşəkar medianın imkanlarını daraltmaq üçün süni müdaxilələr də çoxalıb: "Peşəkar medianın problemlərinin artması bir yandan dərinləşməkdə olan maliyyə sıxıntıları, jurnalistlərin sosial durumlarının pisləşməsi, təhlükəsizlik, təqib halları ilə bağlıdırsa, digər tərəfdən qanunların mürtəce yöndə dəyişdirilməsi xüsusi rol oynayır. Əmək qanunvericiliyinə  edilən neqativ dəyişikliklər və media sahibkarlarının KİV standartlarına  müdaxilə imkanlarının artırılması; İctimai yayım haqqında qanunlara  antidemokratik maddələrin əlavə edilməsi və bunun Avropanın aparıcı dövlətlərində kütləvi hal alması; "Fake news"la mübarizə haqqında qanunların gündəmə gəlməsi, bunun fonunda ifadə azadlığı sərhədlərinin daraldırlmasına cəhdlərin artması narahatlıq doğuran məqamlar kimi qeyd edilib. Toplantıda peşəkar jurnalistika prinsiplərinin qorunub inkişaf etdirilməsi üçün təkliflər müzakirə edilib.