Son.az xezerxeber.az-a istinadən bildirir ki, qəzalı vəziyyətdə olan ağaclardan biri kəsilsə də, digəri üçün akt tələb olundu.

Paytaxtın Binəqədi rayonu 6-cı mikrorayon, Svetlana Məmmədova küçəsi 201 ünvanındakı irigövdəli ağaclardan biri bir neçə gün əvvəl digər ağacların üzərinə aşıb. Sakinlərin aidiyyəti qurumlara müraciətindən sonra bu gün həmin ağac Bakı Şəhər Yaşıllaşdırma Təsərrüfatı Birliyinin əməkdaşları tərəfindən kəsilib.

Aşan ağac kəsilsə də, bir neçə metr aralıda yerləşən qurumuş və aşmaq təhlükəsi olan digər ağacı kəsməkdən imtina ediblər. Birliyin əməkdaşları bildiriblər ki, onların yalnız ağacı budamaq səlahiyyətləri var. Ağacı kəsmək üçün isə sakinlər müvafiq qurumlara müraciət etməli, Ekologiya və Təbii Sərvətlər Nazirliyi tərəfindən ağacın kəsilməsi barədə qərar verilməlidir. Yalnız bundan sonra Yaşıllaşdırma Təsərrüfatı Birliyinin əməkdaşları həmin ağacı kəsə bilərlər.