Alimin evindən külli miqdarda pul və qızıl oğurlayan xadimənin məhkəməsi başlayır
Digərləri 26 Apr 2018 18:03:00 231 0
Bakıda alimin evindən külli miqdarda pul və qızıl oğurlamaqda təqsirli bilinən Xanım Zeynalova və Aqşin adlı şəxsin cinayət işi baxılması üçün Bakı Ağır Cinayətlər Məhkəməsinə göndərilib.
Son.az APA-ya istinadən xəbər verir ki, cinayət işi hakim Əfqan Hacıyevin icraatına verilib.
Məhkəmənin hazırlıq iclası aprelin 30-na təyin edilib.
İttihama görə, Azərbaycan Milli Elmlər Akademiyası Mərkəzi Elmi Kitabxanasının keçmiş direktoru, filologiya elmləri doktoru Aybəniz Əliyevanın Nəsimi rayonundakı mənzilində qulluqçu işləyən Xanım Zeynalova 2015-ci ilin yanvar ayından 2017-ci ilin may ayına qədər külli məbləğdə pul və qızıl-zinət əşyaları oğurlayıb.
Polis əməkdaşlarının keçirdiyi əməliyyat nəticəsində Xanım Zeynalova tutulub və onun barəsində Nəsimi Rayon Məhkəməsinin qərarı ilə 4 aylıq həbs-qətimkan tədbiri seçilib.
İstintaq zamanı Xanım Zeynalova oğurluğu Aqşin adlı tanışı vasitəsi ilə törətdiyi məlum olub.
Ümumilikdə təqsirləndirilən şəxslər zərərçəkmişin 539 min dollarını və 179 min manat məbləğində qızıl-zinət əşyasını ələ keçiriblər.
İstintaq orqanı tərəfindən hər iki təqsirləndirilən şəxsin barəsində Cinayət Məcəlləsinin 177.3.2-ci (oğurluq; külli miqdarda ziyan vurmaqla törədildikdə) maddəsi ilə ittiham elan edilib.