Son.az Trend-ə istinadən bildirir ki, startap turuna Mingəçevirlə yanaşı, Şəki, Gəncə, Tərtər, Şəmkir, Ağdaş və digər ətraf rayon və şəhərlərdən olan 100-dək gənc qatılıb.

Mingəçevir Heydər Əliyev Mərkəzində təşkil olunan tədbirdə ilk olaraq iştirakçılar üçün informativ sessiya keçirilib.

Bildirilib ki, turlar regionlarda fəaliyyət göstərən gənclərə biznes layihələrinin hazırlanması, müzakirəsi və təqdimatı, eləcə də mentorların dəstəyi ilə startap-komandaların və ideyaların formalaşdırılması üçün geniş imkanlar yaradacaq.

Tədbir çərçivəsində İnformasiya Texnologiyalarının İnkişafı Dövlət Fondu tərəfindən keçirilən infosessiyada isə məlumat verilib ki, bugünkü startap turunun iştirakçıları innovativ ideyaları olduğu təqdirdə Fondun elan etdiyi VI Qrant müsabiqəsində də iştirak edə bilər. Qeyd edilib ki, qrant müsabiqəsinə layihələrin qəbulu 30 aprel 2018-ci il tarixinədək davam edəcək.

Daha sonra təşkil olunan interaktiv hissədə startap turunun Mingəçevir şəhəri üzrə müəyyən edilmiş mentorları tərəfindən iştirakçılar üçün müsabiqə və müxtəlif mövzular üzrə təlimlər keçirilib. Təlimlərdən sonra 9 komanda formalaşdırılıb və komandalar arasında müsabiqə keçirilib. Komandalar öz ideyalarını münsiflər heyəti qarşısında təqdim ediblər.