Son.az islam.az-a istinadən bildirir ki, qəsb və oğurluq haqqun-nas (bəndə haqqı) sayılır. Hədislərdə buyurulub ki, hətta qiyamət günündə bəndə haqqı ilə məhşərə gətirilən şəxsləri Allah bağışlamayacaq və yalnız halallıq aldıqdan sonra Onun hüzuruna gəlmələrini əmr edəcək. Bəndə haqqını yalnız halallıq almaqla silmək olar. İnsan oğurluq etdiyi şəxsi tapıb ondan halallıq alsa və səmimi qəlbdən tövbə etsə, Allah onun bu günahını bağışlayar. Amma əgər haqq sahibini tapmaq heç cür mümkün deyilsə, günahkar şəxs gərək oğurladığı əmlakı və ya onun dəyərində pulu həmin adamın adından sədəqə versin. Yəni sədəqənin savabını ona hədiyyə etməyi niyyət etsin. Bundan sonra tam səmimiyyətlə Allaha tövbə edib bağışlanmaq diləsin.