Son.az Xəzər TV-yə istinadən xəbər verir ki, "Xəbər Ertəsi" qiymətləri daha detallı araşdırmaq üçün 28 may metrostansiyasının yaxınlığındakı topdansatış yerində olub.

5 kiloqramlıq yuyucu tozun marketdəki satış qiyməti 29 manat 69 qəpik, topdansatış mərkəzində isə 16 manat, 200 milliqramlıq saç şampunu marketdə 5 manat 60 qəpik, topdansatış mağazasında 3 manat 30 qəpikdir. 750 milliqramlıq qabyuyan maye pərakəndə halda 6 manat 50 qəpiyə satılsa da, topdansatış yerlərində 3 manat 90 qəpiyə təklif edilir.

Araşdırmalarımızdan da məlum olur ki, marketlərlə topdansatış yerləri arasında qeyri-qida məhsullarında 30, 40 faiz, bəzən isə 70 faizə yaxın qiymət fərqi var. Elə topdansatış mağazalarının sahibləri də bunu təsdiqləyirlər.

Mağaza sahibləri deyirlər ki, qida məhsullarında isə qiymət fərqi nisbətən azdır.

Həmçinin vurğuluyurlar ki, tələbat yüksəkdir və məhsul təkcə topdan deyil, pərakəndə də alınır. Bəzən mal çox alındıqda qiymətlərdə endirim də edilir.

Bu məhsullardan başqa meyvə-tərəvəzlər də topdan satılır. Məsələn, marketdə kiloqramı 3 manat 30 qəpik olan banan, topdansatış mərkəzində 1 manat 60 qəpiyə təklif olunur.

Bazarlıq üçün topdansatış mağazalarına üz tutanların bəziləri qiymətlərdə fərq olmadığını, bəziləri isə xeyli ucuz olduğunu bildirirlər.

Vətəndaşların əksəriyyəti keyfiyyətdən razı qaldığını desələr də, bəzi alıcılar etibar etmədikləri üçün topdansatış yerlərindən qida məhsulu almadıqlarını qeyd edirlər.

"Topdansatış yerlərinin sahiblərindən malların bu qədər ucuz olmasının səbəbini də soruşduq. Bildirdilər ki, bunun səbəbi aldıqları məhsulların üzərinə adi marketlərə nisbətən daha az məbləğ qoymalarıdır."

Belə məhsulların keyfiyyətinə gəlincə isə, qida eksperti Məhsəti Hüseynova deyir ki, bəzən topdansatış yerlərində obyektlər kiçik olduğundan qida və qeyri-qida  məhsulları bir yerdə satılır.

Bu da malların həm tərkibini, həm də dadını dəyişə bilər. Bundan başqa soyuducuda saxlanmalı olan məhsulların açıq şəkildə satılması da sağlamlıq üçün ciddi təhlükədir.

Daha ətraflı videomaterialı təqdim edirik:

Son.az