Son.az Xəzər Xəbər-ə istinadən xəbər verir ki, sürüclərin tələbləri müştəriləri ünvan başına çatdırmaq üçün onlara tətbiq olunan tarifin çox aşağı olmasından ibarətdir.

Sürücülərin sözünə görə, hazırki qiymətlər digər ictimai nəqliyyat növlərinin qiyməti ilə hesablanarsa, taksi xidməti avtobus və metro ilə demək olar ki, eynidir.

Taksi sürücülərinin bu qədər səs-küy salmasına baxmayaraq, bolt taksi xidmətinin rəsmilərindən isə heç kim onların qarşısına çıxmadı.

"Xəzər Xəbər"in çəkiliş qrupu ofisə daxil olub, ancaq Boltun əməkdaşı suallara cavab vermək səlahiyyətinin olmadığını bildirib.

Şirkət isə baş verənlərlə bağlı bunları bildirib: "Azərbaycanda minlərlə sürücü Bolt tətbiqindən istifadə edir. Bolt komandası olaraq biz inanırıq ki, xoşbəxt sürücülər sərnişinlərə daha keyfiyyətli xidmət göstərir. Buna görə də biz sürücülərimizə həmişə hörmətlə yanaşırıq və əsas məqsədimiz onları bazarda ən yüksək saatlıq qazanc ilə təmin etməkdir. Biz həmişə vəziyyəti təhlil edirik ki, tariflər müştərilər üçün cəlbedici olsun, qazanc imkanı isə sürücü tərəfdaşlarımızı həvəsləndirsin.

Sürücülərimizdən Bolt ilə bağlı təcrübələri barədə bizə rəy bildirmələrini xahiş edirik, çünki sürücülərimizə keyfiyyətli xidmət və dəstək göstərmək üçün məhz bu rəylərə əsaslanırıq. Çox sayda tərəfdaş sürücülərin olmasına baxmayaraq, biz onların hər birinin fikrini diqqətə alırıq.

Bolt sürücülərinin əməkdaşlıq şərtləri və gəlir səviyyəsi bazarda ən yaxşılarındandır. Platformamızdan istifadəni dayandırmağa və digər xidmətləri sınamağa qərar verən bəzi sürücüləri də başa düşürük - bu, onların seçimidir. Hətta bundan sonra onların bir çoxu yenidən Bolt ilə əməkdaşlığı bərpa edir. Sürücülər və xidmət istifadəçiləri üçün ən yaxşı şəraiti təmin etmək istiqamətində dayanmadan işləməyə davam edəcəyik.

Bolt əsas məqsədi şəhərlərdə hərəkəti asanlaşdırmaq, təhlükəsiz və ekoloji cəhətdən təmiz etmək olan çoxfunksional tətbiqdir. Avropa və Afrikanın 45 ölkəsində (400-dən çox şəhər) 100 milyondan çox insan Bolt xidmətlərindən istifadə edir. Çoxfunksional tətbiq səfər sifariş etmək, karşerinq, skuter və elektrikli velosiped icarəsi, qida və ərzaq məhsullarının çatdırılması kimi bir sıra xidmətlər təqdim edir. Bu gün şirkət dünya üzrə 2,5 milyondan çox sürücü və 100 000-dən çox kuryerlə əməkdaşlıq edir."