Martın 16-da Fransa hökuməti konstitusiyanın 49.3-cü maddəsindən istifadə edərək Milli Assambleyada səsvermədən yan keçərək pensiya yaşını 62-dən 64-ə qaldırmaq üçün pensiya islahatı həyata keçirmək qərarına gəlib. Martın 20-də parlamentin aşağı palatasının müxalifət fraksiyaları hökumətə iki etimadsızlıq səsi verib. Hər iki dəfə lazımi səsləri toplaya bilməyiblər. Beləliklə, islahat qəbul edilib. Bundan sonra fransızların adətən iğtişaşlarla müşayiət olunan kütləvi etirazları başlayıb.

Beləliklə, bu Avropa ölkəsi illərlə digər dövlətlərə insan hüquqlarının qorunmasından dərs keçir, öz dövlətini nümunə göstərir. Baş verənlər isə bunun tam əksini göstərir. Yaşanan olaylar göstərir ki, dünyaya demokratiya dərsi keçən Fransa demokratik ənənələrə sadiq deyil. İstənilən zaman gənc, yaşlı, qadın, uşaq bilmədən döyə, hətta öldürə bilirlər. Son olaylardan sonra bir daha sübut olundu ki, demokratiya bunlar üçün sadəcə bir təzyiq vasitəsidir. Hər gün, hər ay insan hüquqlarından danışan, sərbəst toplaşmaq azadlığından bəhs etməkdən yorulmayan bir sıra beynəlxalq təşkilatlar Fransada baş verən polis zorakılığını, qarşıdurmaları görmür, yaxud özlərini görməzliyə vururlar. Polisin vətəndaşlara verdiyi işgəncələrə susurlar. Çünki həmin beynəlxalq təşkilatlar bəlli güc mərkəzlərinin nəzarətindədir. Ona görə də susmaq məcburiyyətində qalırlar. Hüquq-mühafizə orqanları açıq şəkildə, bütün dünyanın gözü qarşısında sosial vəziyyətə etiraz edən insanlara divan tutmaqdadır. Onminlərlə insan küçələrdə hökumət üzvlərinə, ölkənin siyasi rəhbərliyinə kəskin etiraz etməkdədir.

Beləliklə, özünü demokratiyanın beşiyi kimi dünyaya sırımağa çalışan, insan hüquq və azadlıqlarının qorunmasını ən ali dəyərlər olaraq dövləti üçün əsas şüara çevirməyə hər vəchlə can atan Fransa hökuməti, əslində bütün bu prinsiplərdən nə qədər uzaq olduğunu bir daha nümayiş etdirmiş oldu. Görünən odur ki, Fransa dünyanın gözünün düz içinə baxaraq yalanlar söyləyir. Bu bir faktdır ki, insani dəyərlərin, vətəndaş hüquqlarının "müdafiəçisi" olaraq tanınmağa çalışan Fransada vəziyyət heç də dünyaya nümayiş edildiyi kimi deyilmiş.

Ən acınacaqlısı odur ki, bütün bunlar meydanlarda, yüz minlərlə insanın gözü qarşısında törədilən vəhşiliklərdir. Maraqlıdır, demokratiya anlayışına "fransız qalan" Fransa insanlara qarşı törədilən vəhşiliklərə hansı formada haqq qazandıracaq?

Kamran Seyidov Son.az