Son.az Trend-ə istinadən xəbər verir ki, bunu Elm və Təhsil Nazirliyinin Torpaqşünaslıq İnstitutunun aparıcı elmi işçisi, Oxçuçay İşçi Qrupunun üzvü Sübahət İsgəndərov Zənglana mediatur zamanı deyib.

Onun sözlərinə görə, Oxçuçay İşçi Qrupu olaraq təxminən 1 il ərzində Oxçuçayda və ətraf ərazilərində bir neçə məntəqədə ekoloji monitorinqlər həyata keçiriblər. Ekoloji monitorinqlər zamanı Ekologiya və Təbii Sərvətlər Nazirliyi, Qida Təhlükəsizliyi Agentliyi, Elm və Təhsil Nazirliyinin bir sıra elmi-tədqiqat institutları, "Azərsu" və digər təşkilatlar iştirak ediblər.

"Monitorinqlər iki istiqamətdə aparılıb - fiziki-kimyəvi və bioloji göstəricilər üzrə. Monitorinqlərin ilk nəticəsi budur ki, çirklənmələrin əsas mənbəyi Qafan şəhəri ətrafında olan mədən sənayesi elementlərinin tullantıları və məişət tullantılarıdır. Bütün çirklənmə dərəcələri monitorinqlər nəticəsində müəyyənləşdirilib. Burada işlərin əsas həcmi fiziki-kimyəvi çirklənmələrinin öyrənilməsindən gedir. Daha sonra bioloji tədqiqatlar da aparılıb. Fiziki-kimyəvi çirkləndirmələr üzrə göstəricilərin sistemləşdirilməsinə başlamışıq. Bunun nəticəsində yaxın 10 il üçün proqnozları vermək mümkün olacaq. Həmçinin, müəyyən edilib ki, istər ağır metallar, istərsə də məişət tullantıları ilə çirkləndirmələrin göstəricisi olduqca yuxarıdır. Bu, belə nəticəyə gəlməyə əsas verir ki, Oxçuçay Ermənistan tərəfindən ekoloji terrora məruz qalır. Özü də bu, düşünülmüş terrordur. Onlar bunu edirlər ki, biz çayın suyundan istifadə edə bilməyək. Amma biz də öz növbəmizdə alınmış bütün göstəriciləri, əsasən də fiziki-kimyəvi göstəricilərin nəticələrini sistemləşdirərək Oxçuçayın suyunun müəyyən qədər yaxşılaşdırılması, əsas da kənd təsərrüfatlı təyinatlı istifadəsi üçün metodologiyanın prinsipial əsaslarını işləmişik. Metodologiyanın prinsipial əsaslarını işləyəndə əsasən iki aparıcı mərkəzin təcrübəsindən istifadə etmişik - birincisi, Almaniyanın Franhauzer Tədqiqatlar Mərkəzi, ikincisi isə Amerika Layihə Standartlarından istifadə etmişik", - o deyib.