Hamiləlikdə körpənin inkişafına mane olan hansı amillər var?

Son.az xəbər verir ki, hamiləlikdə düzgün və balanslı qidalanma çox önəmlidir.

Dəmir, fol turşusu, kalsium, A və D vitaminləri kimi əhəmiyyətli qidalar körpənin sağlam inkişafı üçün vacibdir. Qidalanma çatışmazlığı, xüsusilə də dəmir və fol turşusunun yetərsizliyi körpənin beyin inkişafına və ümumi sağlamlığına mənfi təsir göstərə bilər.

Alkoqol və narkotik maddələrin istifadəsi hamiləlik dövründə körpəyə ciddi zərər verə bilər. Alkoqol körpənin beyində inkişaf problemləri yaratmaqla yanaşı, doğuşda da problemlərə yol açır. Narkotiklər isə körpənin sağlamlığını riskə atır, doğuş zamanı narahatlıqlar yaradır və erkən doğum riski artır.

Siqaret çəkmək hamiləlik dövründə körpənin oksigen almasına mane olur və bu da onun inkişafını zəiflədir. Siqaretin tərkibindəki zərərli maddələr körpənin ürək və beyin inkişafına mənfi təsir göstərir. Həmçinin, bu vəziyyət doğuşda erkən doğum və ya aşağı çəki ilə doğulmuş körpə riskini artırır.

Hamiləlik dövründə davamlı stress ananın orqanizmindəki hormon səviyyələrini dəyişdirərək körpənin inkişafını poza bilər. Araşdırmalar göstərir ki, uzun müddət stress altında qalmaq körpənin zehni və emosional inkişafını mənfi şəkildə təsir edə bilər.

Yeterli yuxu və istirahət hamiləlik dövründə çox vacibdir. Yuxusuzluq və davamlı yorğunluq ananın orqanizmində hormonların balansını poza bilər, bu da körpənin inkişafını ləngidə bilər. Yaxşı bir yuxu rejimi ananın və körpənin sağlamlığını qorumağa kömək edir.

Hamiləlik dövründə müəyyən xəstəliklərin olması, məsələn, diabet, yüksək təzyiq, infeksiyalar və ya böyrək problemləri körpənin inkişafına mənfi təsir göstərə bilər. Müalicə olunmamış xroniki xəstəliklər, həmçinin erkən doğum və ya doğuş zamanı digər problemlər yarada bilər.

Kimyəvi maddələr, pestisidlər və yüksək səviyyəli hava çirkliliyi, hamiləlik dövründə körpənin inkişafına zərər verə bilər. Hamilə qadınların bu maddələrdən uzaq durması vacibdir, çünki bu cür maddələr körpənin beyin inkişafına mənfi təsir göstərə bilər.

Qeyd edək ki, hamiləlik dövründə körpənin sağlam inkişafını təmin etmək üçün düzgün qidalanma, stressdən uzaq durmaq, zərərli vərdişlərdən çəkinmək və müvafiq tibbi nəzarət altında olmaq çox vacibdir. Hamilə qadınlar sağlam həyat tərzi sürmək və həkimləri ilə daimi əlaqədə olmaqla körpələrinin sağlam inkişafını təmin edə bilərlər.

Asya Son.az