Son.az BBC-yə istinadla xəbər verir ki, 74 yaşlı Le Scouarnec 1989-2014-cü illər arasında baş vermiş hadisələrlə bağlı ötən aylarda məhkəmədə 299 nəfərə qarşı əxlaqsız hərəkətlər etdiyini qəbul edib. Hökmü oxuyan hakim Aude Burési sabiq cərrahın əsasən xəstə, müdafiəsiz və ya narkoza verilmiş şəxsləri hədəf aldığını bildirib.

20 illik cəzanın ən azı üçdə ikisini çəkilməsi məcburidir. Le Scouarnec artıq 7 ilini həbsdə keçirdiyi üçün 2030-cu ildən etibarən şərti azadlığa buraxıla bilər.

Zərərçəkmişlərdən biri Amélie Lévêque onun bir gün küçədə sərbəst gəzə biləcəyini düşünməyin belə üzücü olduğunu deyib. "Biz artıq normal həyat yaşaya bilmirik, amma ona bu hüququ verirlər. Bu məni iyrəndirir," - deyə o bildirib.

Zərərçəkmişlərin hüquqşünaslarından Francesca Satta hökmü yüngül adlandıraraq, qanunların dəyişdirilməsinin vaxtı çatdığını deyib: "299 nəfərin adı olan bir iş üçün 20 il çox azdır."

Le Scouarnec-in vəkili Maxime Tessier onun hökmə etiraz etməyi planlaşdırmadığını açıqlayıb.

O, artıq 2020-ci ildə dörd uşağa qarşı törətdiyi əxlaqsız əməllərə görə 15 il həbs cəzası almışdı. Yeni məhkəmə prosesi isə fevral ayının sonundan bəri Fransanın Bretan bölgəsində keçirilirdi.

Bu müddətdə bir çox zərərçəkmiş məhkəmədə çıxış edərək yaşadıqları travmalardan danışıblar. Le Scouarnec onların çoxuna əməliyyat zamanı və ya narkoza verilmiş vəziyyətdə toxunduğunu etiraf edib.

Onun evində tapılan şəxsi gündəliklərində əməllərini təfərrüatlı şəkildə yazması nəticəsində polis zərərçəkmişlərin izinə düşə bilib. Bir çoxu baş verənləri yalnız bu yazılardan sonra öyrənib.

İsmayıl Son.az