Trend xəbər verir ki, çempionat Azərbaycan Aşpazlar Gildiyası, Bakı Aşpazlar Assosiasiyası və DIYAR.AZ layihəsi olan "Azərbaycanın Qastronomik Xəritəsi" tərəfindən təşkil olunub.

Badamdar "Hotel & Residences"də baş tutan tədbir Azərbaycan, Türkiyə, Pakistan, Özbəkistan, Qətər, Şri-Lanka, İran, BƏƏ, Vyetnamdan gələn nümayəndələri, həmçinin, peşəkar qənnadçıları və ixtisaslaşmış təhsil müəssisələrinin tələbələrini bir araya gətirərək, ustalıqlarını nümayiş etdirmək və təcrübə mübadiləsi aparmaq üçün unikal platforma təqdim edib.

Açılışda Azərbaycan himni səsləndirilib, şəhidlərin xatirəsi bir dəqiqəlik sükutla yad olunub.

Azərbaycan Aşpazlar Gildiyasının və Bakı Aşpazlar Assosiasiyasının sədri, beynəlxalq dərəcəli usta İlkin Əkbərzadə qeyd edib ki, çempionat ölkədə qənnadı və çörəkbişirmə sahəsinin inkişafına, istedadlı mütəxəssislərin aşkara çıxarılmasına və onların beynəlxalq arenada tanıdılmasına töhfə verəcək.

DIYAR.AZ layihəsi - "Azərbaycanın Qastronomik Xəritəsi"nin müəllifi və rəhbəri Nigar Əmirbəyova tədbirin əhəmiyyətini bu sözlərlə vurğulayıb:

"Belə beynəlxalq çempionatlar tez-tez keçirilməlidir, çünki hər kəsin xaricdə keçirilən yarışlara qatılmaq imkanı olmur. Çempionatı Azərbaycanda təşkil etməklə, biz iştirakçılara özlərini göstərmək, xarici münsiflər və mütəxəssislərlə ünsiyyət qurmaq, suallar vermək, məsləhətlər və tövsiyələr almaq imkanı verdik. Ən əsası isə - bütün bu emosiyaları, rəqabət ruhunu və eyni zamanda, birliyi yaşamaq şansı təqdim etdik!"

Qastronomiya ustası Qabil Quliyev isə bildirib ki, Azərbaycanın milli qastronomiyasının beynəlxalq səviyyədə tanıdılması çox vacibdir:

"Azərbaycanın ənənəvi şirniyyatları və çörəkbişirmə sənəti qədim tarixə malikdir. Xüsusilə lavaş UNESCO-nun mədəni irs siyahısına daxildir. Dünyaya Azərbaycan mətbəxinin zənginliyini göstərmək ölkə irsinin təbliğatı üçün olduqca önəmlidir".

Qonaqlara konsert proqramı da təqdim olunub.

İştirakçılar aşağıdakı nominasiyalarda yarışıb: "Milli şirniyyatlar masası", "Art-sinif (şirniyyat və şokolad məmulatları)", "Toy tortu", "Çörəkbişirmə sənəti", "Meyvə və tərəvəz oyma kompozisiyaları", "Tortun praktiki hazırlanması sinfi".