Trend xəbər verir ki, Azərbaycan Respublikasının Hindistan Respublikasında, eyni zamanda Nepalda akkreditə olunmuş Səfirliyinin müəllifi olduğu məqalənin məqsədi dünya ictimaiyyətinin diqqətini Azərbaycanın üzləşdiyi bu genişmiqyaslı təhlükəsizlik, humanitar və inkişaf probleminə çəkməkdir.

Məqalədə 1991-ci ildən başlayaraq Ermənistanın silahlı qüvvələri tərəfindən Azərbaycanın vaxtilə işğal olunmuş ərazilərinin, o cümlədən Qarabağ bölgəsi və ona bitişik yeddi rayonun fəal şəkildə minalandığı, hazırda Azərbaycan minalarla ən çox çirklənmiş ölkələrdən biri olduğu bildirilir.

Qeyd olunur ki, ölkə ərazisinin 13%-dən çoxunda təxminən 1,5 milyon mina və partlamamış hərbi sursatlar qalmaqdadır. Bu problemin işğaldan azad olunmuş ərazilərdə bərpa və yenidənqurma işlərinə və məcburi köçkünlərin öz evlərinə təhlükəsiz və ləyaqətlə qayıdışına ciddi maneə yaratdığına, İkinci Qarabağ müharibəsinin bitməsindən sonra minaların partlaması nəticəsində 397 vətəndaşımızın həlak olduğuna və yaralandığına diqqət çəkilir.

Mina xəritələrinin təqdim edilməsi ilə bağlı Azərbaycanın çoxsaylı çağırışlarına baxmayaraq, Ermənistanın uzun müddət belə xəritələrin mövcudluğunu inkar etdiyi, yalnız beynəlxalq təzyiqlərdən sonra təqdim etdiyi bu xəritələrin minalanmış ərazilərin yalnız kiçik bir hissəsini əhatə etdiyi və yalnız 25% dəqiq olduğu, son mina hadisələrinin 55%-dən çoxunun bu xəritələrin əhatə etdiyi ərazilərdən kənarda baş verdiyi bildirilir.

Yazıda mina probleminin təsirlərinin aradan qaldırılması məqsədilə ölkəmizdə genişmiqyaslı minatəmizləmə əməliyyatlarının, maarifləndirmə kampaniyalarının və mina qurbanlarına dəstək tədbirlərinin həyata keçirildiyi qeyd edilir. Azərbaycan Respublikasının Minatəmizləmə Agentliyinin (ANAMA) ərazilərin minalardan təhlükəsiz və səmərəli şəkildə təmizlənməsini təmin etmək üçün qabaqcıl minatəmizləmə texnologiyaları və vasitələrindən geniş istifadə etdiyi bildirilir. Bu fəaliyyətlərin 95%-dən çoxunun Azərbaycan Hökuməti tərəfindən maliyyələşdirildiyi və ciddi nəticələr əldə edildiyi qeyd olunsa da, problemin miqyasını nəzərə alaraq ayrılan xarici töhfələrin yetərli olmadığı, daha böyük həcmdə beynəlxalq siyasi və praktiki dəstəyə ehtiyac olduğu vurğulanır.

Məqalədə həmçinin mina problemi üzrə ölkəmiz tərəfindən aparılan qlobal fəaliyyətlər və irəli sürülən təşəbbüslər barədə geniş məlumat verilir. Xüsusilə qeyd olunur ki, humanitar minatəmizləmə Azərbaycan Hökuməti tərəfindən 18-ci Milli Dayanıqlı İnkişaf Məqsədi kimi təsbit olunub, bu sahənin 18-ci Qlobal Dayanıqlı İnkişaf Məqsədi kimi BMT tərəfindən tanınması üçün fəal təşviqat işləri həyata keçirilir.

Məqalənin tam mətni ilə aşağıdakı keçiddə tanış olmaq mümkündür:

https://en.nepalkhabar.com/news/detail/14098