Son.az xəbər verir ki, bunu qaynarinfo-ya açıqlamasında təhsil eksperti Kamran Əsədov deyib.    Ekspert hesab edir ki, Azərbaycanda məktəb təhsili ilə bağlı bəzi əsas problemlər - dərslərin keyfiyyətinin aşağı olması, şagirdlər arasında zorakılıq, məktəblərdə psixoloji xidmətlərin zəifliyi və sosial medianın mənfi təsirləri yalnız telefon qadağası ilə həll edilə bilməz:

"Statistik məlumatlar göstərir ki, 2023-cü ildə məktəblilərin iştirak etdiyi zorakılıq halları əvvəlki illərlə müqayisədə 12% artıb. Zorakılıq hallarının əsas səbəbləri arasında ailə mühitindəki problemlər, psixoloji dəstəyin çatışmazlığı və şagirdlər arasında sosial təzyiq göstərilir. Telefonların istifadəsinə qadağa qoymaq bu kimi halların köklü həllinə səbəb olmayacaq, çünki əsas problem telefonların özündə deyil, onların istifadəsindəki idarəsizlikdə və tədris mühitinin digər problemlərindədir. Dünya təcrübəsindən nümunələr göstərir ki, texnologiyanın təhsildə istifadəsi və ya qadağan edilməsi ilə bağlı yanaşmalar müxtəlif ölkələrdə fərqlənir. Məsələn, Fransa 2018-ci ildən etibarən 15 yaşdan kiçik şagirdlər üçün məktəblərdə telefon istifadəsini qadağan edib. Bu qərar sosial təzyiqlərin və yayındırıcı amillərin azaldılması məqsədi daşıyırdı. Fransa Təhsil Nazirliyinin məlumatlarına görə, telefon qadağası tətbiq edildikdən sonra sinifdəki diqqət səviyyəsi artıb, lakin şagirdlər arasında texnoloji bacarıqların zəiflədiyi müşahidə edilib. Digər tərəfdən, Finlandiya və Estoniya kimi ölkələr texnologiyanın tədris prosesinə inteqrasiyasını təşviq edir. Bu ölkələrdə telefonlardan dərs materiallarına giriş, qrup işləri və interaktiv tapşırıqlar üçün istifadə olunur. Bu yanaşma şagirdlərə texnologiyanı təhsil məqsədilə necə düzgün istifadə etməyi öyrədərək həm tədris keyfiyyətini, həm də rəqəmsal savadlılığı artırır".

Ekspert əlavə edib ki, Azərbaycanda bu qərarı qiymətləndirərkən yerli qanunvericilik və təhsil sistemi nəzərə alınmalıdır:

"Təhsil haqqında" Qanunda tədris mühitində şagirdlərin hərtərəfli inkişafını təmin etmək məqsədi vurğulanır. Telefon qadağası bu məqsədə qismən xidmət edə bilər, çünki yayındırıcı faktorları azaldaraq dərs prosesində intizamı təmin edir. Lakin eyni zamanda texnologiyanın tədris mühitinə uyğun inteqrasiya edilməməsi şagirdlərin rəqəmsal bacarıqlarının inkişafına mane ola bilər. Rəqəmsal savadlılıq 21-ci əsrin təhsil tələblərinin əsas komponentlərindən biridir və telefonların tam qadağan edilməsi bu istiqamətdə ciddi maneə yarada bilər. Statistik təhlillər göstərir ki, texnologiyanın tamamilə qadağan edilməsi ilə onun idarə olunan istifadəsi arasında əhəmiyyətli fərq var. İngiltərədə 2019-cu ildə məktəblərdə telefon istifadəsi ilə bağlı tətbiq olunan müxtəlif yanaşmaların təsirini qiymətləndirən bir tədqiqatın nəticələrinə görə, texnologiyanın düzgün idarə olunduğu məktəblərdə akademik nəticələr 15%-ə qədər yaxşılaşıb. Lakin tam qadağa tətbiq olunan məktəblərdə bu göstərici yalnız 8% təşkil edib. Bu, texnologiyanın tədris prosesinə uyğun şəkildə inteqrasiyasının daha effektiv nəticələr verdiyini göstərir". Kamran Əsədov Azərbaycanın təhsil sistemində telefon qadağası qərarının tətbiqi ilə bağlı bəzi narahatlıqların mövcudluğunu önə çəkib: