Son.az Trend-ə istinadən xəbər verir ki, bu barədə Fransanın "La Gazette du Caucase" onlayn qəzetinin məqaləsində deyilir.

"AZAL təyyarəsinin qəzası ilə bağlı yeni detallar ortaya çıxdıqca, mütəxəssislər və ictimaiyyət ekipajın göstərdiyi şücaətə daha çox heyran qalır, onları qəhrəman adlandırırlar. Pilotlar və bort bələdçiləri son ana qədər fədakarlıqla vəzifələrini icra edərək sərnişinlərin həyatını xilas etməyə çalışıblar. Təyyarə qəzası nəticəsində ekipaj üzvlərindən beş nəfərdən üçü - kapitan İqor Kşnyakin, ikinci pilot Aleksandr Kalyaninov və bort bələdçisi Hökümə Əliyeva həyatını itirib.

İqor Kşnyakin 15 000 saatdan çox uçuş təcrübəsinə malik olub, bunun 11 200 saatı hava gəmisinin kapitanı kimi uçuşlara aiddir. Onu yüksək peşəkarlığı və təcrübəsi ilə tanıyırdılar və onun itkisi Azərbaycan aviasiyası üçün böyük zərbə olub. İkinci pilot Aleksandr Kalyaninov da qəza zamanı az təcrübəsinə baxmayaraq öz işinə böyük sadiqlik göstərib. Hökümə Əliyevanın sakitləşdirici səsi sərnişinləri ən çətin anlarda dəstəkləyib. Bildirilir ki, o, aviasiyanı tərk edib hüquq sahəsində fəaliyyət göstərməyi planlaşdırırdı, lakin taleyin hökmü fərqli oldu.

AZAL ekipajı çıxılmaz görünən vəziyyətdə onlarla insanın həyatını xilas edərək fövqəladə peşəkarlıq və şücaət nümayiş etdirib", - deyə məqalədə qeyd olunub.

Xatırladaq ki, bu gecə "Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsinin Aktau şəhəri yaxınlığında qəzaya uğraması nəticəsində həlak olan 3 ekipaj üzvünün (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) və 21 sərnişinin nəşləri Bakıya gətirilib.

Qeyd edək ki, daha öncə bu qəzada həlak olan 4 nəfərin nəşi və yaralanan 14 nəfər Bakıya gətirilib.

Xatırladaq ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.

Aktau şəhərində qəzaya uğrayan Bakı-Qroznı reysini yerinə yetirən "Embraer 190" təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.