Tramp Rusiya-Ukrayna müharibəsini dayandıra biləcək?

Donald Trump Rusiya-Ukrayna müharibəsinə dair vəd verərək, yenidən prezident seçiləcəyi təqdirdə münaqişəni 24 saat ərzində sona çatdıracağını bildirib. O, bu hədəfə həm Rusiya Prezidenti Vladimir Putin, həm də Ukrayna Prezidenti Volodimir Zelenski ilə münasibətlərindən istifadə edərək çatacağını vurğulayıb. Tramp hər iki tərəfi danışıqlara məcbur etmək üçün Ukraynaya daha böyük dəstək verəcəyini və Rusiyaya təzyiq göstərəcəyini irəli sürüb. Tramp konkret plan açıqlamasa da, ABŞ-nin Ukraynaya maliyyə dəstəyinin miqyasını və bu yardımların ölkənin milli maraqlarına uyğun olub-olmadığını sorğulayıb. Trampın yanaşması, Ukraynanın ərazi bütövlüyünü tam bərpa etməkdən çox, münaqişəni mümkün qədər tez sona çatdırmağı prioritetləşdirir.

"ABŞ-nin dərin dövləti Rusiyanın Ukraynada qələbə qazanmaması üçün çalışır"

Bu sözləri siyasi ekspert Elxan Şahinoğlu Son.az-a açıqlamasında deyib. O bildirib ki, Tramp Ukraynaya hərbi və maliyyə yardımını azaltmaq və ya tamamilə dayandırmaq yolu ilə müharibəni bitirmək istəyirsə, qarşısındakı əsas maneə məhz həmin dərin dövlət olacaq.

"Donald Tramp yanvarın 20-də aniçmə mərasimindən sonra verdiyi vədləri yerinə yetirməyə başlayacaq. Beynəlxalq aləmin əsas diqqəti Trampın Rusiya-Ukrayna müharibəsini sona çatdırmasıyla bağlı daha əvvəl verdiyi vədi necə yerinə yetirəcəyi ilə bağlıdır. ABŞ-nin dərin dövləti Rusiyanın Ukraynada qələbə qazanmaması üçün çalışır, bu siyasət Ukraynanın ərazi bütövlüyünü təmin etməsə də, hər halda müharibənin Kremli xeyrinə bitməsinə əngəldir. Tramp Ukraynaya hərbi və maliyyə yardımını azaltmaq və ya tamamilə dayandırmaq yolu ilə müharibəni bitirmək istəyirsə, qarşısındakı əsas maneə məhz həmin dərin dövlət olacaq".

Rusiya-Ukrayna müharibəsi

Rusiya-Ukrayna müharibəsi 24 fevral 2022-ci ildə Rusiyanın genişmiqyaslı hücumu ilə başlayıb və bu, 2014-cü ildə Krımın ilhaqı ilə başlayan gərginliyin davamı kimi qəbul olunur. Müharibənin erkən mərhələsində Moskva tez bir zamanda Kiyevi ələ keçirmək məqsədini daşısa da, Ukrayna güclü müqavimət göstərdi və münaqişə uzandı. Rusiya, Ukrayna şəhərlərinə, xüsusilə Mariupol və Zaporojiya ərazilərinə raket zərbələri endirdi ki, bu da geniş miqyasda dinc əhali arasında itkilərə səbəb oldu. Avropa ölkələri Ukraynaya hərbi və iqtisadi yardım göstərərək Rusiyaya qarşı sanksiyalar tətbiq etdi. Qara dəniz üzərindən taxıl ixracı ilə bağlı sazişlər isə qlobal ərzaq təminatında yaranmış böhranı az da olsa yüngülləşdirdi. Eyni zamanda, Zaporojiya Atom Elektrik Stansiyasının nəzarətə alınması bölgədə böyük təhlükəsizlik narahatlıqları yaratdı. Ukraynanın şərq və cənub bölgələrində döyüşlər davam edərkən, bu münaqişə həm beynəlxalq siyasətdə, həm də qlobal ərzaq təhlükəsizliyində ciddi dəyişikliklərə səbəb olub.

İslam Son.az