Bu barədə Trend-ə Azərbaycanın Pakistandakı səfirliyindən məlumat verilib.

Səfirliyin nəzdindəki hərbi attaşe aparatı tərəfindən təşkil olunan təntənəli rəsmi qəbula Pakistan Hərbi Hava Qüvvələri Komandanının müavini, aviasiya marşalı İrfan Əhməd ali qonaq qismində qatılıb. Pakistanın tanınmış ictimai-siyasi xadimləri, İslamabadda akkreditə olunan diplomatik korpusun təmsilçiləri, Pakistan ordusunun yüksək rütbəli zabitləri, mətbuat nümayəndələri, bu ölkədə yaşayan azərbaycanlılar, səfirliyinin əməkdaşları və onların ailə üzvləri də rəsmi qəbulda iştirak ediblər.

Səfir Xəzər Fərhadov tədbirdə çıxış edərək Azərbaycan Silahlı Qüvvələrinin tarixi haqqında iştirakçılara məlumat verib, 1918-ci il iyunun 26-da Azərbaycan Xalq Cümhuriyyəti hökumətinin qərarı ilə ölkəmizdə ilk milli diviziyanın yaradıldığını bildirib.

Diplomat 1991-ci ildə Azərbaycanın müstəqilliyinin bərpasından sonra Ermənistanın hərbi təcavüzü və vətəndaş müharibəsinin getdiyi bir vaxta xalqın tələbi ilə hakimiyyətə qayıdan Ulu Öndər Heydər Əliyevin ölkədəki xaos və anarxiyanı aradan qaldırdığını, iqtisadi-siyasi sabitliyi təmin etdiyini diqqətə çatdırıb. Məhz Ümummilli Lider Heydər Əliyevin həyata keçirdiyi müdrik siyasət nəticəsində bütün sahələrdə olduğu kimi, ordu quruculuğunda da böyük uğurların qazanıldığı qeyd edilib.

X.Fərhadov Ümummilli Lider Heydər Əliyevin siyasətinin Azərbaycan Respublikasının Prezidenti İlham Əliyev tərəfindən uğurla davam etdirildiyini vurğulayıb. O, yüksək döyüş hazırlığına malik və müasir silahlarla təchiz edilən Azərbaycan Silahlı Qüvvələrinin Prezident, Müzəffər Ali Baş Komandan İlham Əliyevin rəhbərliyi ilə 2020-ci ildə 44 günlük Vətən müharibəsində qazandığı şanlı Zəfərin xalqımızın tarixinə qızıl hərflərlə yazıldığını vurğulayıb. Bildirilib ki, Ermənistanın otuz ilə yaxın müddətdə işğal altında saxladığı torpaqlarımız bu Qələbə nəticəsində azad edildi. Azərbaycan Ordusunun Vətən müharibəsində həyata keçirdiyi ən müasir döyüş strategiyası və taktikası dünyanın qabaqcıl hərbi təhsil müəssisələrində dərindən təhlil edilir və öyrənilir.

Diplomat işğaldan azad edilmiş ərazilərdə həyata keçirilən genişmiqyaslı bərpa və quruculuq işləri barədə iştirakçılara ətraflı məlumat verib.

Səfir Prezident İlham Əliyevin Azərbaycan ilə Pakistan arasında strateji tərəfdaşlıq münasibətlərinə xüsusi önəm verdiyini və ikitərəfli əməkdaşlığın gündən-günə inkişaf etdiyini vurğulayıb. O, Pakistanın Baş naziri Məhəmməd Şahbaz Şərifin Azərbaycan Respublikasına sonuncu rəsmi səfərini xatırladaraq, yüksək səviyyədə keçən bu səfər çərçivəsində iqtisadi-ticari, enerji, nəqliyyat və digər sahələrdə əməkdaşlığın daha da genişləndirilməsinə dair mühüm məsələlərin müzakirə olunduğunu bildirib.

X.Fərhadov Azərbaycan ilə Pakistan arasında digər sahələrdə olduğu kimi, ikitərəfli hərbi əlaqələrin də yüksələn templə inkişaf etdiyini, hərbi və hərbi-texniki sahədə əməkdaşlığın bundan sonra da genişlənəcəyinə əminliyini ifadə edib.

Azərbaycan Silahlı Qüvvələrinin Pakistandakı hərbi attaşesi, polkovnik Mehman Novruzov tədbirdə çıxış edərək Azərbaycan Ordusunun tarixindən söz açıb. Bildirib ki, zəngin təbii sərvətlərə və strateji mövqeyə sahib olan Azərbaycan xalqı əsrlər boyu güclü dövlətlərin təzyiqlərinə və hərbi təcavüzlərinə ciddi müqavimət göstərərək müstəqillik və dövlətçilik uğrunda mübarizə aparıb. Azərbaycan Xalq Cümhuriyyəti mövcud olduğu cəmi 23 ay ərzində müstəqil dövlətin bütün atributlarını, o cümlədən nizami ordu yaratdı. Erməni-bolşevik birliyinin işğalçı siyasətinə qarşı mübarizə aparan Azərbaycan hökuməti 1918-ci il iyunun 26-da diviziya statuslu hərbi korpusun yaradılması haqqında qərar qəbul etdi və bununla da milli ordunun təməli qoyuldu. 1920-ci ildə Azərbaycanın müstəqilliyinin qızıl ordu tərəfindən süquta uğradılmasına baxmayaraq, Sovet İttifaqı dövründə də Azərbaycan xalqı milli döyüş ruhunu və qədim hərbi ənənələrini davam etdirdi.

Bildirilib ki, İkincin Dünya müharibəsində Azərbaycan diviziyaları Bakıdan Berlinədək şərəfli döyüş yolu keçdi. Sovet İttifaqı dövründə azərbaycanlı gənclərin hərbi hazırlığını diqqətdə saxlayan Ulu Öndər Heydər Əliyevin təşəbbüsü və gərgin səyləri nəticəsində 1971-ci ildə Bakıda Cəmşid Naxçıvanski adına ilk Hərbi Lisey açıldı. 1991-ci ildə Azərbaycan Respublikasının müstəqilliyin bərpasından sonra həmin liseyin məzunları Silahlı Qüvvələrin yaradılmasında mühüm rol oynadılar.

Polkovnik Mehman Novruzov Azərbaycanın hərb tarixinin qəhrəmanlıq salnaməsi olan 44 günlük Vətən müharibəsindən söz açaraq, Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusunun həyata keçirdiyi əks-hücum əməliyyatı nəticəsində ərazilərimizin işğaldan azad olunduğunu diqqətə çatdırıb.

Prezident İlham Əliyevin yürütdüyü uzaqgörən siyasəti nəticəsində yüksək peşəkarlığa malik və müasir silahlarla təchiz olunmuş Silahlı Qüvvələrimizin Azərbaycanın suverenliyini və ərazi bütövlüyünü müdafiə etməyə qadir olmaqla yanaşı, regional və qlobal sülhə və təhlükəsizliyə mühüm töhfələr vermək iqtidarında olduğunu vurğulanıb.

Həmçinin Azərbaycan ilə Pakistan strateji tərəfdaşlıq münasibətlərinin və hərbi əməkdaşlığın qardaşlıq və ortaq dəyərlər üzərində qurulduğu vurğulanıb. Ölkələrimizin Silahlı qüvvələri arasında həyata keçirilən yüksək səviyyəli səfərlərin, hərbi-təhsil proqramlarında iştirakın, birgə təlimlərin təşkilinin, hərbi-texniki əməkdaşlığın daha da inkişaf etdirilməsinin bu sahədə işbirliyinin daha da dərinləşməsinə xidmət etdiyi diqqətə çatdırılıb.

Çıxışlardan sonra Pakistan Silahlı Qüvvələrinin Hərbi Orkestri tərəfindən hər iki ölkənin Dövlət himnləri, Azərbaycan, Pakistan və Türkiyənin hərbi marşları ifa edilib.

Rəsmi qəbulun keçirildiyi salonda Azərbaycanın tarixini, mədəniyyətini və turizm potensialını əks etdirən fotosərgi də açılıb.

Tədbirdə Azərbaycan Silahlı Qüvvələrinin döyüş hazırlığına və hərbi gücünə, Vətən müharibəsində şanlı Zəfərə və ölkəmizin iqtisadi uğurlarına dair videoçarxlar da nümayiş etdirilib.

Rəsmi qəbul Pakistanın televiziya kanalları və nüfuzlu kütləvi informasiya vasitələri tərəfindən geniş işıqlandırılıb.