"Tacikistana çox uğurlu səfər həyata keçirildi və burada Mərkəzi Asiyanın roluna diqqət yetirmək lazımdır. Mərkəzi Asiyada mühüm geosiyasi proseslər gedir. Bütün dünyanın marağı bu gün Cənubi Qafqaza, Mərkəzi Asiyaya yönəlib və bu xüsusda M.Asiyanın nəqliyyat yükdaşımlarında rolu artır.

Orta Dəhliz ideyasının reallaşdırılması, Zəngəzur dəhlizinin açılması, bu istiqamətdə mühüm əhəmiyyət kəsb edir. Digər tərəfdən məhz Tacikistanda verilən mühüm mesajlar bu gün həm də ölkəmizin təhlükəsizliyi ilə bağlı yaranan təhdidlərin neytrallaşdırılması istiqamətində oldu. Yaddan çıxarmaq olmaz ki, Tacikistan farsdilli dövlətdir və burada artıq verilən mesajların ünvanının hansı dövlət olması da aydın olur.

Eyni zamanda Gürcüstanın Baş naziri İrakli Qaribaşvili Qəbələdə səfərdə oldu və bu, çox yaxşı liderlər arasında formalaşan bir ənənənin göstəricisidir. Çünki ötən ilin oktyabr ayında Prezident İlham Əliyev Gürcüstanda Mçxeta bölgəsində səfərdə idi və artıq Azərbaycanın və Gürcüstanın regionlarına da liderlər səfər edirlər və bölgələrdə yaranan şəraitlə tanış olmaq imkanı qazanırlar. 

Gürcüstan Azərbaycan üçün çox önəmli tərəfdaşdır, Azərbaycanın Qərbə çıxış imkanlarının genişləndirilməsində hazırda mühüm potensial mövcuddur. Bakı-Tbilisi-Qars vasitəsi ilə yüklərin daha sürətli və intensiv şəkildə daşınması əsas prioritetdir. 

Eyni zamanda həm də Azərbaycan prezidentinin Qazaxıstana səfəri də, həm Türkdilli Dövlətlərin Əməkdaşlıq Şurası yeni adla (Türk Dövlətləri Təşkilatı) fəaliyyət göstərir. Bu xüsusda Azərbaycan-Qazaxıstan münasibətləri də diqqət çəkir. 

Mütləq şəkildə qeyd etməliyik ki, Qazaxıstan da , Tacikistan da KTMT-nin (Kollektiv Təhlükəsizlik Müqaviləsi Təşkilatı) üzvləridir. KTMT-nin üzvü kimi Ermənistan Azərbaycana qarşı məkirli niyyətlər güdür, çox qərəzli planlar fikirləşir. Onların da neytrallaşdırılması üçün bu görüşlər mühüm əhəmiyyət kəsb edirdi.

Bu gün yeni dünya düzəni formalaşdırılır və rəsmi Bakı hazırda prioritet və gündəmdə olan məsələləri diqqətdə saxlayır. Amma ən önəmli məsələ Ermənistanla sülh sazişinin imzalanmasıdır. Təəssüflər olsun ki, Ermənistan bu prosesi uzatmaqla məşğuldur. Lakin Azərbaycan bölgədə və bölgədən uzaqda yerləşən dövlətlərə açıq mesajlar verir, Ermənistanın ətrafında formalaşan güc mərkəzlərinə, onların himayədarlarına da mühüm mesajlar ötürülür və əsas məqsəd bölgədə sülhün, təhlükəsziliyin və sabitliyin qorunmasından ibarətdir". 

Təhməz Əsədov Son.az