Bu barədə "Vaqner" özəl hərbi birliyinin rəhbəri Yevgeni Priqojin deyib. O, Baxmutda adminstrativ binaya hərbi müxbir Vladlen Tatarskinin (Tatarski ötən gün Sankt-Peterburqdakı "Strit-bar" kafesində baş verən partlayışda ölüb) adının yazıldığı Rusiya bayrağının sancıldığını bəyan edib.

Bəli, artıq yaz aylarıdır. Rusiya qış ayları ərzində Donetsk və Luqansk vilayətlərinin inzibati sərhədlərini ələ keçirmək üçün qarşıya qoyduğu məqsədlərə çata bilmədi. Qış Ukrayna üçün də çətin keçdi deyə bilərik. Yayılan məlumatlara inansaq, bu gedişlə yaz və yay ayları Rusiya üçün daha çətin ola bilər. Çünki Ukrayna əks-hücum əməliyyatlarına başlayacağı barədə xəbərlər bir-birini əvəz edir.

Bu barədə ən real məlumat məhz Ukrayna müdafiə naziri Rezkinov tərəfindən gəldi. O bildirdi ki, əks-hücumlar tezliklə və bir neçə istiqamətdə baş tuta bilər. Əslində bu ssenari nə Ukrayna üşün, nə də Rusiya üçün yaxşı heçnə vəd etmir. Çünki hadisələrin bu cür inkişafı müharibənin daha uzun vədəyə doğru irəliləyəcəyinə bir işarədir. 

Artıq Qərb mənbələri Rezkinovun bəyanatından sonra öz ehtimallarını da irəli sürüblər. Qərbin iddiasına görə, Ukraynanın Ruisyaya əks-hücumu iki istiqamətdə baş verə bilər. Birincisi, Xerson istiqamətindən girməklə Krıma gedən quru yollara nəzarəti ələ keçirmək. İkincisi isə cənub cəbhəsinin Rusiya ilə quru əlaqəsini kəsmək üçün Donbas bölgəsi və Zaporojya vilayəti arasındakı ərazilərə nəzarəti ələ keçirmək. 

Əslində ilk baxışdan Ukrayna üçün yaz ayları, və Qərbdən göndərilən ucsuz-bucaqsız yeni hərbi texnikalar, silah-sursatlar müsbət nəticəyə ümidləri artırmış ola bilər. Lakin Rusiyanın da sakit oturacağı, hücumların aqresiyasını azaltmaq üçün "B" planı hazırladığı istisna deyil. 

Qərb tərəfindən göndərilən yüzlərlə yeni döyüş tankına yiyələnən Ukraynanın yeni əks-hücumu münaqişənin taleyi baxımından həlledici önəm kəsb etsə də onu da nəzərə almaq lazımdır ki, Ukraynanın canlı qüvvə imkanları getdikcə azalmaqdadır. Qərbin, ABŞ-ın hərbi yardımının da limitsiz olmadığını düşündükdə, Rusiyadan daha çox Ukrayna üçün vəziyyət daha təhlükəli hal ala bilər. 

İstisna edilmir ki, Ukrayna Ordusu bu əks-hücumda Rusiyanın şərq və cənub cəbhəsi arasındakı əlaqəni kəsə bilməsə, belə bir fürsət nəinki bir daha ələ düşməyəcək, bu, müharibənin taleyi üçün həlledici ola bilər. Ən ağır döyüşlər isə hələ qabaqdadır.

Təhməz Əsədov Son.az