Azərbaycan gəncliyinin inkişafı, onların mənəvi dəyərlər əsasında tərbiyəsi və yaradıcılığının düzgün istiqamətləndirilməsi, istedadların aşkarlanması və tanıdılması "NUR Art House" qalereyası və "Arts Council Azerbaijan" QHT-nin birlikdə həyata keçirdiyi "Start" layihəsinin əsas məqsədini təşkil edir. Fevralın 1-dən sənətsevərlərin ixtiyarına verilən gənc və həvəskar rəssamların sərgisinin məramı isə incəsənətin təbliğində gənclərin rolunu artırmaq, onların bu işin təbliğatçısı qismində çıxış etmələrinə dəstək olmaqdır. Sərgidə müxtəlif mövzuda işlənən rəngkarlıq əsərləri nümayiş olunur.

Yanvarın 31-də baş tutan açılış zamanı "NUR Art House" qalereyasının direktoru, Əməkdar mədəniyyət işçisi, sənətşünaslıq üzrə elmlər doktoru, professor Röya Tağıyeva, "Arts Council Azerbaijan" təşkilatının rəhbəri Dadaş Məmmədov çıxış edərək sərgi haqqında fikirlərini bildiriblər. "START" layihəsinin məqsəd və məramından söhbət açıblar. Təşkilatçılar sənətdə ilk addımlarını atan gənclərimizə xeyir-dua verib, Azərbaycan Gənclərini qarşıdan gələn bayram münasibətilə təbrik ediblər. Tədbirdə ziyalılarımız, diplomatik missiyaların nümayəndələri, sənətsevərlər iştirak ediblər.

Sərgidə iştirak edən gənc və həvəskar rəssamlar: Əsmər Məmmədova, Afaq Əkbərova, Elşən Rzazadə, Günəş Cəfərova, Rəvan Cabbarlı, Firəngiz Tarıverdiyeva, Fatimə Əliyeva, Reyhan Məhərrəmova, Ləman Nağıyeva, Gülparə Məmmədova, Samirə Faizova, Xəyalə Yusifova, Jalə Həsənzadə, Aytən Əkbərova, Səkinə Şərifova, Gülər Əliyeva, Çinarə Əhmədova, Eliza Qurbanova, Fidan Əmirova, Nərmin Nəsibova, Vəfa Əhmədova, Əsəd Əsgərov, Fəridə Məmmədova, Turanə Məmmədova, Zibeydə Sadıqlı, Rəna Hüseynova, Vüqar Məmmədov, Leyla Qədirova, Kamilə Nəcəf, Ksana Məmmədova, Məryan Moqbeliyeva rəngkarlıq əsərləri ilə öz daxili aləmlərini, sənətə yanaşmalarını təqdim ediblər. Onların təbiətə, cəmiyyətə, bəşəriyyəti narahat edən mövzulara münasibəti rənglərin dili ilə özünəməxsus tərzdə ifadə olunub.

"Arts Council Azerbaijan" qeyri-hökumət təşkilatının və hər zaman gəncləri dəstəkləyən "NUR Art House" qalereyasının bu sərgini təşkil etməkdə əsas məqsədi gənc nəslin incəsənətə olan marağını daha da artırmaq, Azərbaycan rəssamlarını tanıyıb və tanıtdırmaqdır.