Bu barədə Bakı Metropolitenindən məlumat verilib.

Qeyd edilib ki, gecə saatlarında Bənövşəyi xətdəki təsərrüfat qatarını idarə edən, 1958-ci il təvəllüdlü təsərrüfat qatarı maşinisti Aydın Kərimlinin qəfil halı pisləşib və dünyasını dəyişib.

"Dərhal həmin motovoz maşinistinin köməkçisi Bənövşəyi xəttin qatar dispetçeri ilə əlaqə saxlayıb, təcili tibbi yardım xidməti dəvət olunub, dərhal aidiyyəti qurumlara, həmçinin maşinistin ailə üzvlərinə məlumat verilib.

Məlumat üçün bildiririk ki, hər gün Bakı metropoliteninin xətlərində sərnişindaşıma fəaliyyəti başa çatdırıldıqdan sonra təmas xətlərindən yüksək gərginlik çıxarılmaqla gecə növbəsinin işləri başlanır. Bu zaman metro xətlərində planlı şəkildə müxtəlif təsərrüfat, təmir-bərpa, sazlama-sınaq işləri aparılır. Bu işlərin icrası zamanı mal-material, avadanlıqların daşınması, həmçinin tunellərdən müxtəlif tullantıların çıxarılması məqsədilə təsərrüfat qatarlarından istifadə olunur.

Yayılmış məlumatlarda motovoz maşinistinin dünyasını dəyişməsinin qeyd edilməsinə baxmayaraq, foto və videolarda yanlışlığa yol verilərək bu faktla bağlı metro stansiyalarında hərəkət edən sərnişin qatarları və onların maşinistlərinin foto və videoları yerləşdirilib. "Bakı Metropoliteni" QSC bildirir ki, müəssisənin fəaliyyətinə dair məlumat yayarkən, foto və videoların seçimində diqqətli olmaq və çaşqınlığa yol verməmək vacibdir. Bu, eyni zamanda yayılan informasiyanın həqiqiliyinə və reallığı əks etdirməsinə xidmət göstərər", - deyə bildirilib.